Jugireis im Schnee
S Leiterteam het sech för d Jugireis mol öpis anders usdänkt. Mer send met 18 Meitli ond Buebe met Poschti ond Zog of Grindelwald. Det ahcho, het eus s Gondeli of de Bärg brocht, s Wätter esch en Traum gsi. Jede het en Schlette gfasst ond denn esch’s los gange. Nor hämmer zerscht no de räschtlech Ufsteg z Fuess müesse bewältige. Es esch ahsträngend gsi, aber es het sech glohnt. Nachhär semmer met eusne Schlette abekorvt, es het riese Spass gmacht. Zmetzt i derä wonderschöne Bärgkulisse hämmer s Zmettag us eusem Rocksack gnosse. D Chend händ natürli en Schneeballschlacht gmacht, d Leiter send schön brav gsi:-).
Gstärkt hämmer eus weder of d Schlette gwogt, nor de Schnee esch wiiter onde emmer weicher ond pflotschiger worde. Mer händ denn eusi Schlette abgäh ond send z Fuess de reschtlech Teil of Grindelwald gloffe. Die Wanderig esch fascht glich spektakulär gsi wie d Schletteabfahrt, d Leiter wösset wohl no wieso:-). Donde ahcho hämmer alli Chend zämegsammlet ond händ sie met em Bus is Dorf lo fahre. Ond so hämmer eus of de Heiwäg gmacht ond de loschtig Tag lo usklenge.