Sieger vo de 2. Stärkeklass am Regionalturnfest in Eike: Meitliriege Böze!!
Bi rechtig heissem Wätter händ mer eus of Eike as Regionalturnfescht gmacht. Di ältere Meitli händ sech vor de Abreis ide Tornhalle troffe zom nomol d Grät- ond Gymnastiküebig dorezmache. Die velle Trainings ide letschte Woche händ sech glohnt, d Üebige send im Chopf gsi, also ab of Eike.
Glichziitig hämmer eusi neue, schön blaue, Meitliriege-T-Shirt zom erschte Mol döfe zeige ond es het super usgseh! Danke nomol de Patrizia förs organisiere!
Di jöngere Meitli händ met Wiitsprong ahgfange ond do hets mehreri ganz gueti Resultat gäh. Di Ältere händ sech of de Böhni för d Gymnastik bereit gmacht. Klar send alli chli nervös gsi, schliesslech eschs praktisch för alli de erscht Wettkampf ide Gymnastik gsi, aber d Üebig esch ganz guet gloffe ond alli händ ehres beschte gäh, super! Denn eschs grad wiitergange, di ältere Meitli zom Grättorne id Halle ond die jöngere Meitli zom Hendernisslauf. Au die 2 Diszipline hämmer ohni Zwöschefäll hender eus brocht. Alli zäme händ mer alls letschti Disziplin de Spelparcours met em Hockeyschläger of eus gnoh. Do het mer müesse gscheckt met em Schläger ond Ball Hendernis bewältige, au do händ alli en tiptope Ihsatz zeigt.
S ahschlüssende Ässe hämmer eus verdient! Nachhär händ sech d Meitli nochli döffe im Bach abchüele oder es Glacé gnüsse, bevors denn weder hei of Böze esch.
Am Sonntig send no wiiteri Verein im Ihsatz gstande. Wo mer denn gäg de Obe erfahre händ, dass mer ide 2. Stärkiklass gonne händ, hämmers chum chönne glaube. Gesamtpönkt: 26, 13!! Eifach super!! Mer Leiterinne send rechtig stolz of euch, Bravo!!