Sponsorentag Mädchen- und Jugendriege Bözen am Samstag 20.05.2006
Am Samschtig, 20. Mai 2006, esch de Sponsoretag vo de Meitliriege ond de Jugi ofem Programm gstande. Zom eusi Jugikasse chli ufzfölle händ d Chend fliessig Sponsore gsuecht. De eigentlech Sponsorelauf esch en intressante Hendernislauf gsi, wo d Chend händ müesse Wasser transportiere ond natürli versueche, möglechscht wenig Wasser z verlühre, damet nach 5 Minute Laufziit möglechscht vell Wasser im Chübel gsi esch. Leider het s Wätter ned so metgspellt, aber d Chend händ trotzdem de Plausch gha ond händ alles gäh! Das esch nämli no ahsträngend, sech 5 Minute lang dor sonen Hendernislauf z kämpfe! Liebi Meitli ond Buebe, ehr händ das SUPER gmacht, BRAVO!!!
Zom Abschloss vo dem Tag hets denn no en chlini Show gäh, wo di verschedene Abteilige vo de Meitliriege de Zueschauer en chline Ibleck i eusi Aktivitäte ide Tornstond zeigt händ. Au de Nochwochs vo de Gymnastikgroppe Böze het no ganz en speziell för dä Ahlass igstudierti Show zeigt, s Publikom esch begeischteret gsi.
A derä Stell wette mer nomol allne Sponsore ond Zueschauer för di toll Onterstötzig rächt härzlech danke.