Kantonale Meisterschaften im Vereinsturnen in Gränichen 06.06.2010
Am Sonntig hämer eus scho sehr früeh am Morge i de Tornhalle z Böze troffe zom die perfekte Welle z frisiere ond eus z schminke! Nach guet 45 Minute semmer denn Rechtig Gränichen abdüüst. Wo mer ahcho send esch euse Biwakplatz no frei gsi ond mer händs grad in Beschlag gno. Nachem Itorne hämer eus au scho glii parat gmacht för de Reif. Es het sech rechtig guet tornet vor vellne Bözer Fans ond met de Note 9.68 semmer sehr z frede gsi! Scho glii esches met em Zauberlehrling wiiter gange. Met de Note 9.53 semmer belohnt worde ond so met beide Üebige in Final cho! Nachere chorze Mettagspause ond noche schminke ond frisiere esches denn wiiter gange. De Reif esch ned ganz optimal verlaufe, aber mer händ ned gross chönne dröber nochedänke, well mer eus grad händ müesse in Zauberlehrling verwandle. Sternfinger ahkläbt, Stern im Haar ond los gange esches! Mer händ s Publikum verzauberet, mer händ nomol alles geh ond send z frede gsi met eus! Ez hets gheisse ab go Dusche..jipiee alles leer, alles för eus:-). Nach de chorze Erfröschig eschs denn as Rangverläse gange! SPANNEND esches gsi... Gymnastik Bühne mit Handgerät : 3. STV Brugg, 2. (es esch en Üebig met Reif ond of de 1.Platzierti nor 0.01 Röckstand!!) de STV Brugg! 1.DR Bözen!!! Jupieee mer händ euse Titel chönne verteidige! Gspannt hämmer of de Zauberlehrling gwartet. Au det esches sehr knapp gsi: 1. DTV Oberrüti 9.68 2. DR Bözen 9.66. Das het natürli müesse gfiiret werde ond so semmer met eme luute Hup Konzert im Bäre z Böze vo vellne Fans empfange worde! Danke nomol allne för s fane ond för de tolli Empfang ond Apéro! Bim feine z Nachtässe hämer denn de Tag loh usklinge loh.
Raffa