Auftritt am Jubiläum 100 Jahre TV Sulz
Nachemene asträngende Samstig in Grosswange hämmer eus am Sonntig scho weder uf die 12.00 Uhr bim Volg Böze versammlet. Zom 100-jährige Jubiläum vom TV Sulz dörfe mer met eusere neue Gymnastik „Zauberlehrling“ ufträtte.
In Sulz acho hämmer denn eusi spezielle Frisure gmacht (toupiere, toupiere, toupiere…. ond Elvislocke). Am 13.30 Uhr het den de Weltrekordversuch agfange. 45 Bärre ond meh weder 350 Lüt esch scho beidruckend gsi.
Gli drufabe send mer go Iturne, wo eusi müede Muskle langsam weder ächli wach worde send. Am 16.30 Uhr hämmer denn äntli euse Uftritt im gfüllte Festzelt gha. Es esch e chlini Hauptprob för STV-Gala gsi. Trotz de trochne Loft ond ächli ängere Formatione esch eus Gymnastik guet glunge. Aschlüssend hämmer au no es Gruppeföteli mit dem Sven Epiney dörfe mache. (Eusem neue Fan oder es ächt eher omgekehrt?)
Nochem umzieh send mer eusi Getränke- und Essensbons go ilöse. Au noch längerem astoh händ denn doch no all öppis öbercho.
Es esch trotzt chälti und Rege, Rege, Rege es super Wocheend gsi.