Gym-Day in Grosswangen
Am Samstig, 15. Mai 2010 hämmer eus am 7.30 Uhr i de Tornhalle Böze versammlet. Nachere Stond frisiere ond schminke send mer nach Grosswange abgfahre. Nachere einstündige Autofahrt ond de Strapaze bim Parkplatz sueche, send mer den äntlech bim Wettkampfgländ acho. Nachdem mer es trochnigs Örtli für euses Bivack gfonde händ, es denn scho gli mit Iturne losgange.
Mit dem Reif händ mer d’Wettkampfsaison eröffnet. Mer händ eus guet gschlage trotz dene vele Linie uf de Wettkampfflächi. Nachere chorze Verschnuffpause esch es au scho witergange met eusere neue ohni Handgrät Gymnastik „Zauberlehrling“. Eusne vier jüngere het me Nervösität agseh, aber sie händ sech guet dor d’Üebig brocht. Es guets Gfüehl hämmer gha ond bi de Zuschauer es glaub guet acho, denn sie send so vertüft gsi, dass sie gar ned gwösst händ wenn d’Üebig fertig gsi esch.
Bevor mer send go z’Mittag ässe händ mer eusi Note erfahre im Reif 9.69 ond bim Zauberlehrling es 9.68. Zweu super Note für de erst Wettkampf. Es paar Stöndli spöter esch den de zweiti Durchgang gsi, dasmol esch zerscht de Zauberlehrling ufem Programm gstande und den de Reif. Mer händ eus bi beidne Üebige chöne verbesserere. Bi beide Üebige hämmer es 9.72 übercho.
Om die 18.30 Uhr hämmer den öpis welle im Festzelt go ässe, nor es het nöm soviel Platz gha resp. gar kei Platz meh. Darom send es paar vo eus i Tornhalle go ässe. Chorz vor 21.00 Uhr het den s’Rangverlese agfange. Mer händ zweumol de 1. Platz gholt. Super!!
Nachemene chline Freudetänzli bi eusem Bivack send mer den richtig Böze losgfahre. Einigi send direkt hei ond die andere send noch Sulz a Pfingstparty om de ansträngendi Tag z’fiire.