Schweizermeisterschaften im Vereinsturnen 12.+13. September 2009
Samstag 12.09.09
Am Samstig morge am 7ni hämmer eus i de Tornhalle z Böze troffe zom schminke und frisiere! D Stimmig esch guet gsi ond es händ sich alli of es spannends Wocheänd in Lyss gfreut! Mer send chlii frühner als plant fertig gsi drom hämmer au ohni Stress chönne losdüüse ond händ gnueg Ziit gha zom es passends „Siegerlied“ z finde. Nach guete 90 Minute semmer denn in Lyss ahcho ond händ au scho es super Biwack för de hötig Tag gfonde! Am 11:50 eschs denn los gange met em Reif! Dank eusne Fans händ mer eus we Dihei gfühlt ond es esch wonderschön gsi zom Torne! Nochher hämer gnueg Ziit gha zom öpis z Mittagässe ond eus zo Kobolde omzschminke! Am 14:55 eschs denn wiiter gange met de listig/lustigen Kobolde, natürli händ eus eusi Fans au weder tatkräftig onderstötz ond mer händ d Note vo 9.80 chum chönne glaube! Mer send zueversechtlich gsi, dasses met em Kobold is Final längt! Mer händ nor no de Reif müesse abwarte..ond das het duuret!! Ab ond zue send weder es paar vo eus zo de Handgrät Note-Tafele go luege aber es esch nie öpis Neus gstande!! Doch plötzlich!!!!! eis Gschrei: mer händs als 4te ond letschte Platz in Final gschafft!! Ez hämer eus s Znachtässe ond d Duschi aber rechtig verdient! Nachdem mer s Znacht gnosse ond d Schlofplätzli parat gmacht händ semmer chorz go Party mache!! Mer händs rechtig loschtig gha we mer ah de Föteli cha gse. Am 23h send denn alli langsam im Bettli gläge ond händ probiert z schlofe... einige esches glonge, anderi händ em Nachtwächter chlii Gsellschaft gleischtet.
Raffaela
Sonntig 13.09.09
Trotz einer eher unruhige und unbequeme Nacht sind alli 14 Finalistinne fit und munter gsi und händ sich schön gmacht für die bevorstehende zwoi Uftritt. Nachemene feine zMorge hämer denn au scho müesse iturne. Mer hät scho chli gmerkt, dass alli chli nervös gsi send. Als erschts isch Gymnastik mit Handgrät dra cho. Mir händ no eusi Ritual durchgfüehrt und eus nomol ganz fest konzentriert. Au am Sonntig sind eusi treue Fans debi gsi. Mir sind mitemene guete Gfühl abem Platz und au eusi Fans händs super gfunde. Öbs echt für en Podestplatz länget?
Am Nomittag isch denn de Kobold dra cho. Mir händ eus riesig uf de Uftriit gfreut aber sind au chli trurig gsi, wels letschte mol gsi isch womer de Kobold turned händ. Mir händ nomol alles gäh und au dasmol isches nid schlecht gloffe. D‘Konkurenz isch aber gross und durum hämer gwösst dases es sehr spannends Rangverlese wird.
Mir händ au nüm lang müesse warte, scho händ sich alli versammlet zum d’Endresultat zerfahre. Mir sind total nervös gsi. Und es hät sogar mit Gymnastik Bühne mit Handgrät agfange. „4. Platz …blablabla…Kreuzlingen“, eus isch scho mol en riese Stein vom herze gfalle, wel mer sind jo als 4. In Final cho, „3. Platz…unter der Leitung von allen Turnerinnen…“ Mir sind nüme drus cho. „Hä? D’Alex isch doch eusi Leiterin?“ Bis mer denn tatsächlich drus cho sind hät de Speaker au scho gseit wer ufem 2. Platz isch und zwar mir, d‘Dameriege Böze! „…Somit isch Dameriege Bözen Schweizer-Meister“. D‘ Freudeträne sind nur no gloffe, mir sind all öberglöcklich gsi, obwohl mers gar noni recht händ chöne glaube. Eifach genial! In Gymnastik Bühne ohne Handgerät hämer de hervorragendi 4. Platz beleit.
Nach unendlich viele Kössli vode Sulzer und no es paar Föteli ufem Podest hämer eus uf de haiwäg gmacht. Trotz Stau hämer i eusne riiise Autos voll die Party gha und ich glaub jede uf de Autobahn hät mitbecho oder erfahre dasmer Schwiizermeister sind. „YEAHYEAAAAAH“
In Böze händ ganz vieli Lüüt uf eus gwartet und eus en super Empfang vorbereitet. Nach dem mer alli mitenand agstosse händ und fein znacht gesse händ im Bäre sind mir Schwiizermeisterinne, nur ganz e bizeli müed, hai go pfuuse.
Danke viel mol an alli!
Jessiiii
A dere Stell möchted mer no all eusne treue Fans wo eus Samstig und Sonntig unterstötzt händ, de Organisiererinne vom Apero, eusere Frau Gmeindammannin Verena Erb und allne wiitere Persone wo eus am Sonntig Obe empfange händ ganz, ganz fest DANKE säge!! Merci vell mol für euchi Unterstötzig, ehr send eifach super!