Kantonali Meischterschafte Vereinsturne 7. Juni 2009
Bereit för de grossi Tag hemmer eus am 07.20 i de Tornhalle troffe, zum schminke ond frisiere. Denne eschs met 4 Autos ab uf Wettige gange wo das Johr d KMV doregfüehrt worde esch. Mer händ es super Bivack gfunde wo mer mol rechtig vill Platz gha händ. Glii hämmer met em Iitorne agfange well mer scho am 10.24 eusi neu Reifüebig „O“ händ dörfe zeige. Sie esch recht guet aacho ond schliesslich semmer met de Note 9.67 of em 1ste Platz vo de Vorrondi glandet. Nachher hämmer gnüegend Ziit gha zom eus of de „Kobold“ vor z bereite. Nacheme wiitere Itorne hämmer eusi Üebig am 13.00 zeigt. Well mer wie „gspannti Rüebli“ tornt händ ond ned wie Bradwörscht hets do vor Oberrüti knapp of de erschti Platz glängt (trotz Fuessschweiss-Teppich:-)). Mer send also 2 mol als erschti in Final iizoge.
Mer händ eusi Üebige im Final weder i de gliiche Reiefolg präsentiert ond händ no meh Fans gha als i de Vorrondi. Met em Kobolde semmer die letschti Vorfüerig vom Final gsi ond 5 Minute spöter het denn au scho s Rangverläse aagfange. De Speaker hets aber au müesse spannend mache ond mer send fascht verzwiiflet bem warte… Denn eschs aber losgange ond woner gseit het de "Aargauermeischter vo de Gymnastik Bühne met Handgräte esch d DR Böze meteme 9.73" semmer fascht uusgflippt, mer händ nor no chönne schreie ond gompe. Jetzt hämmer nor no müesse abwarte was mer met em „Kobolde“ gschafft händ ond au do, chum z glaube, mer händs gschafft. Mer händ euse Aargauermeischtertitel verteidigt! Nach dere Uufregig send jetzt d Freudeträne nor no so gflosse, 2 mol Aargauermeischterinne!! Das het denn au met eme riise Hupkonzert müesse gfiiret werde. Womer denne z Böze aacho send hämmer euse Guetschii im Bäre iiglöst ond hend öppis gässe damit mer au weder zo Chräft cho send.
Astrid