Gym-Day in Grosswangen am 23. Mai 2009
Am morge 08.15 Uhr hämmer eus i der Turnhalle in Böze zum schminke und frisiere versammlet för euse erscht Wettkampf i dem Jahr. Um 10.15 Uhr semmer losgfahre nach Grosswangen (serscht mal met eusne neue grosse Rollköffere:-)).
Womer acho send, hämmer au grad en guete Platz gfunde, womer de ganz Tag Schatte gha händ.
Euse 1. Uftrett hämmer den am 13.04 Uhr gha met em Kobolde. Und de 2., Gymnastik mit Reif, grad en Stund spöter am 14.12 Uhr. Trotz es paar Formationsschwierigkeite und andere chline Fehler hämmer eus rächt guet gschlage; mer send i beidne Üebige die beschte gsi im erste Durchgang:-).
Nach em Mittagesse und ere grosse Pause esches den met em 2. Durchgang wiitergange, wo mer am 18.06 Uhr s’Kobolde und en Stund spöter de Reif nomol händ dörfe turne. Dank de tatkräftige Mithilf vo eusne treue Fans esches bem zwoite mal no besser gloffe.
Mit grosse Überraschig hämmer em Kobolde en super Note vomene 9.80 becho und au bem Reif nomol en besseri Note wie mer au im Bricht uf der gym-day Siite chan läse:
Graziöse und mit viel Eleganz geturnte Darbietungen waren in der Gymnastik Bühne zu beklatschen. Hier behauptete sich die Damenriege Bözen als das Mass der Dinge. In der Disziplin ohne Handgeräte mussten nur winzige Abstriche in der technischen Beurteilung hingenommen werden. Mit den Noten 9.62 und 9.80 ging der Sieg diskussionslos an Bözen. Die 13 Turnerinnen aus Grosswangen lieferten zwei ausgeglichene Durchgänge und belegten im starken Feld den 6. Rang. In der Gymnastik Bühne mit Handgeräte doppelte Bözen nach und siegte vor seinen aargauischen Vereinsteams aus Brugg 1 und 2.
Nach ere chalte Duschi hämmer euse Essensbon welle ilöse, doch leider hämmer vo dem Menu nur de Salat becho, da Sie vom andere nüd me gha händ und send denn an Grill gscheckt worde, wo mer zerscht mal fascht en Stund händ müesse astoh!!
Denn, nach em Esse und de Glace wos no zum Menu geh het, semmer natürli no ist Partyzelt go feschte, bevor mer eus in verschiedene Gruppe weder uf de heimwäg gmacht händ.
Sandra