• News
• Agenda
• Galerie
• Anlässe
• Vermietung
• Gästebuch
• Links

Anzahl Besucher

seit 21.09.2002:

 

• Gymnastikgruppe
• Damenriege
• Frauenturnverein
• Meitliriege

Schweizermeisterschaften im Vereinsturnen in Solothurn 13.+14.09.2008

Am Samstig morge hämer eus scho früeh troffe, demet mer parat sind för das wechtige Wochenänd. Gschminkt, gstrählt ond nach erste Glichgwechtsüebige simmer be Räge nach Solothurn gfahre ond händ of ahib Tornhalle gfonde, wo eus ned immer Glück brocht het. Wägem schlächte Wetter esch alles chli eng gsi, aber mir sind unkompliziert ond händ em Gang es Biwack gmacht. Itorne und scho hets gli s’erstemol ernst golte. Mer händ met de Kobolde d’Lüt versuecht zverzaubere, doch nachem Wettkampf sind einige ned so glöcklich gsi öber d’Leistig ond mer händ ghofft mer chöntets de em Final am Sonntig besser mache. Nachere Verpflegigispause simer weder go iturne, damol hämer d’Halle nöme so ganz elei för eus gha ond mer händ eus müese chli mache. Deför hämer de omso grösser eusi Reifüebig Kasino tornet ond oje leider esch au do ned alles riebigslos verlofe. Jetzt hets nome no gheisse warte, bes alli Note dosse send ond mer wösse öb mer im Final sind. Leider sind d’Note ned regelmässig itreit worde. Doch gli hämer die tolli Nachricht gha, dass mer met em Reif als 3. de Finalizog gschafft händ. Ypee! Kobolde esch no ungwöss gsi ond mer sind emol go ässe. Vorhär hämer aber no d’Grossfäldüebig vo Sulz gluegt. Esch no lostig gsi em trochne zstoh ond zuezluege, wie sich die andere em Schlamm wälze.

S’Ässe esch sehr fein gsi, aber leider esch es ned eso gmeütlich gsi em Festzält, s’Wätter halt. Dorom simer weder schnell ad Resultatewand ond händ gluegt, wie’s om eus Kobolde stoht ond super, mer sind als 4. Platzierti Gruppe en Final cho. Also Tagesfazit: Mer händ oises Ziel de Finalizog erreicht.

Nach dem spannende Nomitag simer id Unterkonft, aso nome ed Tornhalle, go dusche ond am 9 simer eigentli scho bettfertig gsi. Mer händ jo welle fit sie för de Sonntig. Zom ischlofe hets de als Guetnachtgschichtli eusi zwoi Üebige ofem Video zgseh geh. S’Ischlofe esch för die Meiste kes Problem gsi, doch ede Nacht händ gwössi Partyrückkehrer öberhaupt kei Rücksicht gnoh und händ total egoistisch Sackhöpfe verastaltet oder e einere Lutstärki no müesse diskutiere. Aber am Morge am 7 hämer de doch scho zemli frösch usgseh nachem frisiere ond schminke. Guten Mutes hämer de Raffa ere Gebortstag meteme Rimusfrühstück afo fiere. Doch nochhär hämer de auscho Morgegymnastik bem Itorne gmacht. Ond scho als zwoite vom 1. Finalblock hämer s’Casino zeigt. Es het kei grossi Patzer und Panne geh ond mer send alli erliechteret gsi, doch erst am Obe am 4 bem Rangverläse hämmer de meh gwösst. Bes zom nöchste Itrone hämer nochli zuegluegt. Am Nomitag simer de erst ede Metti vom 2. Finalblock dra cho. Es esch rechtig schön gsi vor so vell Publikum ond eigene Fans ztorne ond mer händ alli euses Beste geh. Dorom simmer de au guten Mutes as Rangverläse. D’Alex ond Katja händ müesse en Izog mache, wo alli Verein abegläse worde send wo am Final teilgno händ ond oh Schreck Böze händs ergendwie vergässe. Esch das esch schlächts Zeiche? Leider jo, well met em Casino simmer vom 3. of de 4. Platz gheit. Mer send scho enttüscht gsi, aber händ no of Kobolde ghofft. Doch ach oh Schreck dört simer vom 4. of de 5. Platz gheit ond de het Krüzlinge no glich vell Rangpönkt gha. Mer händ d’Welt nöme verstande ond sind nome no en Träne usbroche ond die Arm Alex ond Katja händ müesse tapfer näbem Podest stoh ond lächle. Mer händ eifach nome no hei welle, us dere Tornhalle ond wäg vo Solothurn. Doch mer händ gwösst, dass eus dehei eusi treue Fans met eme Apero empfange ond mer händ eus gar ned rechtig chönne dröber freue. Sogar die legendäri Hupifahrt es Dorf esch usgfalle. De Apero esch de au ned sehr fröhlich usgfalle ond mer händ ehn leider au ned chönne schätze. Trotzdem möchte mer eus em Nochhinein no deför bedanke. Esch lieb gsi vo euch, danke! Zom Abschloss hämer eus als Groppe zämegrafft ond die Schwizermeisterschaft met eme gmeinsame Nachtässe lo usklinge.

Obwohl die andere Gruppe em Final besser gsi sind als mer hämer euses Ziel de Finalizog gmeisteret ond of da döfe mer stolz si! Ond eusne treue Fans danke mer au ganz herzlich för d’Unterstötzig!