Trainingsweekend in Churwalden vom 17.-19. August 2007
Am Fritigobe send d’Autos belade worde ond Gymnastikgroppe esch för es Weekend ed Bärge gange. Nei, ned zom d’Bärge gnüsse oder rodle oder so…, sie händ nämlich fliessig trainiert. Am Fritigobe zwar nöme, well denne wärs schochli spot gsi, deför send de d’Reife weder neu ibonde worde, demet sie au weder so schön glänze wies Gäld, wo e ihrere Üebig Kasino en wechtigi Rolle spellt.
Am Samstigmorge nacheme super Zmorge esch es de au scho los gange met em Training. Das Weekend esch onder em Motto Fernseh gstande ond dorom esch es au gad met ere Quizshow losgange. D’Froge send rächt aspruchsvoll gsi, wer weiss de scho wie die Wörf bem Schwinge heisse. Mir händ ned nome Reif ond Troja güebt, sondern au versuecht a eusem Usdruck zschaffe dorom hämer au es Schauspieltraining gha. Die Jüngere send go Zmittag choche ond de Rest het no Troja güebt.
Am Nomittag esch de Spielfilmzeit ofem Programm gsi, döt hämer ausi Körperhaltig gschuelet. S’Znacht händ de die Ältere vorbereitet. Glöcklicherwies hets ned grägnet ond alli händ sech ofs Rodle gfreut, well bes jetz hets emmer grägnet gha ond d’Rodelbahn esch de ned offe gsi, aber damol… Mer händ eus also of de Wäg gmacht ond d’Enttüschig esch gross gsi, wo mer ade Tafele gläse händ: „Wegen technischen Defektes bis auf weiteres geschlossen.“ So semer de halt weder hei ond händ eus am Spielplatz vergnüegt.
Zom Abschloss vo dem Tag hämer de no DVD gluegt. D’Entscheidig esch schwer gsi ond dorom esch de glöslet worde. S’Los het de Film „Bin Jim“ (oder so ähnlich) bestomme. Es esch kein Hollywood Film ond em Gägesatz zo eus esch döt ned eso vell gredet worde, aber alli händ en mit Spannig verflogt.
Am Sonntigmorge esch de de Höheponkt gsi em Training. „Churwalden sucht das Topmodel“ esch agseit gsi. Mer händ müesse e Modeschau choreographiere ond euses Kleidigstöck präsentiere. Esch ganz en lostig Sach gsi ond het allne Spass gmacht. Öber de Mittag hämer de gässe, packt ond s’Lagerhus putzt. Mir sind wörklich sehr speditiv gsi.
Am Nochmittag hämer de nomol so rechtig a eusne Üebige gfielet ond nachere chline Massage hämer d’Autos weder belade. On ab nach Böze! Leider esch da ned eso schnell gange wie mers eus gwönscht händ de es het chli Stau gha ond zom Teil rechtig fest grägnet. Em Fuchsbärge hämer de es Päuseli gmacht ond erfahre was es heisst of es rechtigs Coci zwarte, well Pepsi usem Migros esch jo ned s’gliche.
Zom Glöck semer de alli weder gsond ond meh oder weniger monter en Böze acho.