Schweizermeisterschaften im Vereinsturnen 8.+9.9.2007
Am Samstig, 8. September hämmer eus am morge früeh ab de 7ne i de Turnhalle itroffe um eus für d' Schwyzermeisterschafte parat z’mache (schminke, frisiere, nochli Gliechgwechtstraining, usw.).
Ca. halb 9ni semmer denn, met eusne neue pinkige Pullis ;-)" rechtig Lyss abgfahre. Guet acho, hämmer de au scho bald eusi Handgrät-Üebig, met dere mer serscht mal ade Schwyzermeischterschafte gstartet send, müesse zeige. D’ Nervosität esch gross gsi, aber eusi treue Fans wo zahlrich erschene send, händ eus super unterstützt. (Velle Dank nomal an euch!) Und wo mer de ändlich eusi Note ghört händ, hämmers fascht ned chöne glaube. Mer händ nämli en super Note vomene 9.48 becho.
Am Namitag, 5 vor 3 händ mer "ältere" vo de Gymnastikgruppe no s'Troja turnet. Met riese Sprüng und fascht perfekte Formationen hämmer au det en super Leischtig bracht, und zwar metere Note vo 9.65.
Nachdem mer öbis chlises g'ässe und eus usgruet händ, semmer vor de Resultatewand vom Handgrät gstande und händ gspannt uf die letscht entscheidend Note gwartet....
...Vor Freud semmer enand id Arme gfalle, wo mer gseh händ das eus met beidne Üebige is Final glanget het.
Müed vom turne und de Ufregig hämmer no chli de anderne Turner zueglueget und send den spöter zäme öbis z' Nacht go ässe. De Usgang het natürli au ned dörfe usfalle, schliesslich hämmer eusi 2 Finalplätz müesse fire. Nachdem mer no eis i de Bar trunke händ, semmer den so langsam i eusi Unterkunft gfahre.
Det hets zerscht mal gheisse "Luftmatratze ufblase", wobi einigi chli is verzwiefle cho send (chund kei Luft ine oder Loch ide Matratze). Aber denn ändli hämmer eusi Duschi chönne gnüsse und send denn au scho bald go schlafe, so das mer alli fit send, am Sunntig em Final .
Sandra
Am Sonntig esches am 6i am Morge scho weder los gange. Während sich die Einte vo de Diz und de Sarah d’Frisur händ loh mache oder vo de Alex gschminkt worde sind, händ die Andere fliessig packet. Mir sind so schnell fertig gsi mit allem, dass mer sogar euses z’Morge ohni Stress händ chöne go esse. Hmmm…isch das fein gsi! Nur im Zelt isches recht chalt gsi!
Aschliessend hämer öpe en Stund Ziit gha zum go bisle, Blüemi pflücke, Zähputze etc. D’Nervosität isch immer wie meh gstege. Alli zäme sind binenand ghocket und händ gwartet bis mer endli händ chöne d’Reifüebig präsentiere. Damits aber nid so langwilig isch, händ d’Raffa und d’Sarah die Idee gha Selbstuslöserföteli zmache. Sie sind echt toll worde nur…uuuppppsss….d’Alex fehlt droffe!!!(ENTSCHULDIGUNG ALEX!!!!)
Nachem super Itorne isches denn plötzlich scho si wiit gsi: DAS FINALE!!!
D’Wetterumständ händ eus riese Sorge gmacht (Wind und Sonne). Es esch eus denn au wörkli zum Verhängnis worde, aber mir händ eifach s’Beste geh.
Grad nach eusem Block ischs Rangverläse gsi. Gspannt und ungeduldig hämer ufs Ergebnis gwartet. Mir händ keis guets Gfühl gha. Aber denn…“Ufem 4.Platz de STV Brugg“, “Ufem 3.Platz DR Bözen“. Es esch unfassbar gsi, mir sind mit de Reifüebig 3. worde!!!!!! D’Alex und Katja sind mitemene riese Lächle ufem Podest gstande und mir händ gjubelt wie verrockt und au es paar Freudeträneli händ nid gfehlt.
Die „Chline“ händ ab denn Fürobe gha und die Grosse händ sich scho förs Troja parat gmacht. Bevor sie ufs Feld händ chöne, händ sie sich nomol ganz fest konzentriet. Paar Minute spöter isch scho alles verbi gsi. D’Fans händ gjubelt. Sie händs echt grossartig gmacht.
Bim Rangverlese hämer denn erfahre dases „nur“ för de 4.Platz glänget hät. D’Enttüschig isch sehr gross gsi, au för die „Chline“.
Nachem Rangverlese hämer eusi sieben Sache zämepackt und händ eus uf de Haiweg gmacht. Bide Usfahrt in Effinge hämmer all ufenand gwartet damit mir euses traditionelle „Dorf-Hupe“ händ chöne mache.
En riese Öberraschig hät eus vorem Bäre erwartet. Vieli Verwante, Bekannte, Fründe und Kollege händ eus herzlich Empfange. All zäme händ das tolle und erfolgrieche Wocheend gfieret und mitemene feine z’Nacht die zwoi Täg beendet. Todmüed aber i denke voll happy sind alli pinkige Tussis nach Hause gange.
Mir Bözerinne chönt echt stolz uf eus si!!!!!
Jessica