Schweizermeisterschaften in Sissach 2006
D’Gymnastikgruppe het am 9. / 10. September 2006 a de SMV teilgnoh. S’Troja, also euisi ohni Handgrätüebig, esch zersch ofem Programm gstande. D’Sabi, Patrizia, Nadia, Ursula, Sandra, Katja, Raffa, Sarah und d’Alex händ alles ghä. 9.56 das esch doch en super Note. Bi de Küüle hets leider es paar Patzer ghä, aber mer send trotzdem met eme 9.28 belohnt worde. Denne hets Warte aagfange, längts ächt under die erste 5 bi de ohni Handgrätüebig, was en Startplatz im Final am Sonntig bedütet hätti? Leider hets ganz, ganz knapp ned glängt. Um 0,03 hämmer de Final verpasst.
Am Obe hämmer denne no 1,2,3 a de Bar gno. Nodigsno send denne alli is Bett. Zmetzt i de Nacht het euisi Gymnastikgruppe no Zuewachs übercho…., zwoi Sulzer händ no es Schlofplätzli gsuecht. Zersch händs welle im WC übernachte, aber d’Diz (die gueti Seel) het verbarme met ehne gha und si denne is weiche Bettli „begleitet“!
Obwohl mer am Sonntig ned händ döffe turne, esches en sehr en erfolgrichi SMV gsi för euis. Met zwoi 6. Plätz döfe mer sehr zfriede sii.
Zum Schluss danke mer allne treue Fans wo euis in Sissach unterstützt händ (Wärtsacheuufpasser, Hopp-Rüefer, Gstohlni-Protemaine-Regler, Mitlieder, Seeleunterstützer, Fahneträger, Föteler)!!