NWS in Muttenz 16. Oktober 2005
Scho früeh am Morge esch es bi euis losgange. Am 6.30 Uhr hets i de Turnhalle scho gheisse: Glichgwecht halte und d’Füess massiere, demet au no die Letschte verwachet.
Denne semmer losgfahre Rechtig Muttenz. Es esch Schlag uf Schlag gange, Iiturne, Umzieh und denne esch es scho losgange met eusiere Première:
Met vell Nervosität semmer verliebt gsi, send gflüchtet, händ kämpft und gfäschtet (einzelni Gfühl, wo mer im Troja düend verturne). Mer send alli ned ganz schlüssig gsi, obs euis guet gange esch oder ned! Aber wo mer denne euisi Note gseh händ (9.48), denne esch euis klar gsi, das mer met euisere neue ohni Handgrät uf em rechtige Wäg send.
Denne hämmer 4 Stunde uf euise nächschti Ufritt müesse warte.
Nach dere lange Warteziit hets denne weder gheisse Iiturne. D’Küüleüebig esch super gloffe. Es send nome wenigi Küüle abegheit. Und dorom semmer worschindli au met enere super Note (9.57) belohnt worde.
Am Schluss hämmer de 3. Rang met em Troja und de 1. Rang (teilt met em DTV Muhe) met de Küüle beleit.
Hey Fraue, das esch en super Tag gsi. Ehr händs wörkli spitze gmacht. Ich freui mi scho uf d’Wettkampfsaison 2006.
Alex