Schweizermeisterschaften in Glarus 11.+12.09.2004
Es paar Stechwort, wo mer dezue en Senn chöme:
-Nervosität
-Loftmatratze
-Mamis, Papis, Frönde,...
-Aspannig / Freud ond Gnüsse
-Hoorspray ond Schmenki
-14.30,16.48 ond 10.10 Uhr
-Final
-Büsli
-4.Platz
-Evolution und d’Indianerballüebig
Zo de Stechwort jetzt es paar Sätz, demet alli, wo ned ade Schwizermeischterschaft gsi send, au drus chöme:
-Hoorspray ond Schmenki:
Met dem het das Wochenänd agfange ond so zäge au ufghört. Am Samschtig- ond ned erwartet au am Sonntigmorge het d’Alex eusi Augereng wäggschmenkt, demet mer en wache Idrock mache. S’Frisureteam het e Frisur zauberet, wo jedere Bewegig ond jedem Wätteromschwong standghalte het – fascht sogar no s’dusche.
-Büsli:
Eusi Fahrerin d’Barbara het eus nämli met dem schnälle Fletzer vo Böze uf Glarus ond retour chauffiert. Klein aber oho: Schotz vorem Gwetter, Privatlimousine id Onderkonft, öberraschend vell Platz för eus ond euses Material
-Nervosität:
Euse ständig Begleiter a dem Wochenänd.
-14.30,16.48 ond 10.10 Uhr:
Eusi Wettkampfzite. 14.30 Evolution ond 16.48 Ball am Samschtig ond upiduuu, am Sonntig am 10.10 Uhr nomol s’Evolution.
-Evolution und d’Indianerballüebig:
Vo eusere Ballüebig hämer eus a de SM verabschedet. D’Dernière esch aber guet gange ond meteme 9.16 semer zfrede. Die Note het eus uf de 4. Platz brocht, womet mer de Finalizog om ein Rang verpasst händ.
Deför het’s aber metem Evolution glängt, met 9.35 semer ebefalls 4. gsi ide Vorrondi, womet mer d’Teilnahm em Final gschafft händ – onbeschriblech guet!!!!!!!!!
-Aspannig / Freud:
Warte ond hoffe bes zo de letschte Vorfüehrig, schaffe mer’s en Final oder ned? Das esch d’Frog gsi, wo eus fascht zom Verzwifle brocht het. Di erlösendi Antwort hämer denn aber erscht gha, wo d’Julia ond Katja di letschte Groppe persönlech send go froge. Situation: Die 2 laufe of die Groppe zue, mer andere verfolge vonere Distanz was abgot. Sie dreie sech om, laufe normal devo, aber nach 3m Abstand got’s nöme, es zocke em Gsecht – Kreisch, Schrei, Jubel, Träne, Omarmige, Omegompe, Spenne....(Mer händ’s gschafft, mer send em Final!!!!!!!!!!!)
-Loftmatratze:
Nachdem mer eus nach eusem Jubel weder chli beruhigt händ, semer ändli go Znacht ässe. Z’metzt bem Dessert chonnt d’Nochrecht, dasses dosse donneret ond bletzt. Alli uf ond ab zo de Täsche ond Dreß wo no dosse lege, zämepacke ond zom McDonald en Schärme spurte, bes eus d’Barbara metem Büsli chonnt cho hole.
Jetzt womer scho em Büsli setzte, chömer grad so guet eusi Onderkonft go sueche ond bezieh. Well di einte gar kei Loscht meh gha händ zom Feschte oder anderi nöm händ möge, semmer alli zäme ide Onderkonft blebe ond händs eus versuecht of eusere Loftmatratze gmüetlech zmache. (Loftmatratze: Bist du zu lang, ist sie zu kurz- ist sie zu schmal, bist du zu breit) Aber ergendwie hämer doch nochli chönne schlofe, bevor mer denn am viertel ab 6i weder uf send.
-Final:
Es mega Erläbnis, woni glaub ned als einzigi nomol wett erläbe. S’Chribbele ond d’Onruhe, bevor mer ändli chönd go itorne. S’Warte bevor mer uf d’Flächi chönne. D’Nervosität bes d’Musig chonnt. D’Konzentration während em Torne ond de Gedanke; alles ge woni cha. S’Gnüsse vom Applaus ide Schlosspose ond d’Erliechterig wenn’s verbi esch ond guet gloffe esch.
Met 17 Rangpönkt semer ufem 4. Platz blebe, aber ich wörd säge, mer chönne stolz uf eus si ond vor allem zfrede.
-Mamis, Papis, Frönde,... :
Eusi Fans. Es paar send scho als treui Onderstötzig am Samschtig cho luege ond afüre, de Räst esch denn am Sonntig agreist. Ich glaub es get niemer, wo ned hei aglüte het am Samschtigobe om d’Neuigkeit vom Finalizog metzteile. Ha ämel emmer weder eini gseh am Natel hange...
Eusi Fahneträgerin Karin ghört secher au no onder das Stechwort. Sie esch am Samschtig äxtra uf Glarus cho, demet sie erem Amt als Fahneträgerin cha nochecho. Danke tussig Kage.
Es physisch ond psychisch asträngends Wochenänd, aber es het sech glohnt!
Tanja