NWS in Basel am 17.10.2004
Scho früeh esch es a dem Sonntigmorge losgange, met em Auto uf Frick und witer met em Zog uf Basel. Dete hämmer geduldig uf euses Trämmli gwartet, wo eus d'Sybille met de Schreckensbotschaft, sie hegi de Fahne im Zog vergässe, weder gweckt het. Ond scho esch si losgspurtet om nomol im Zog go noluege, öb er velecht no neumet ome esch. Zemlech lang hämmer uf sie gwartet (oder esch es eus nome so vorcho wells so chalt gsi esch?) bes denn d'Alex au no loszoge esch, om de Fahne ond d'Sybille go sueche... Zom Glück send sie bald zäme weder cho und händ au euse Fahne "wohlbhüetet" metbrocht.
De Wettkampf esch guet verloffe, zwar händ sech bi eusne Formatione chlini Fehler igschleche und d'Alex esch au es betz skeptisch gsi was eusi Üebig abelangt het, aber d'Patrizia het eus vo eusne Zwifel befreit: es 9.69!! Wow, e super Note! Scho fascht unglaublich...
Jetzt hets wederemol gheisse abwarte und luege, was die andere Vereine so mache... Dorom hämmer eus entschide, dete euses Zmittag izneh, was gheisse het, dass, wenn me en Fittnesställer het welle, meh en Täller voll Salat id Händ drockt becho het und me denn in Räge use het müesse zom onder es chlises Zält z'stoh ond zwarte, bes sis Fleisch ofem Grill meh oder weniger dore gsi esch...
Es paar Stonde spöter hämmer scho es betz vo eusem Sieg döffe träume, nomeno Liestal esch eus im "Wäg gstande", doch met ehrere Note vomene 9.29 hets für eus gheisse: Nordwestschwizermeister!! A de Siegerehrig hämmer denn ufs oberste Träppli chönne stoh und de schön Pokal döffe in empfang neh.
Diheime acho het eus eifach kei Beiz "welle" ond so semmer halt is Restaurant "Steime" witer. Danke euch zwene a dere Stell für die spontani Iladig!
Ursula