Schweizer Jugendcup Sieger 2003 - Gymnastikgruppe Bözen!
Am 6. Dezember 2003 het z'Huttwil de 14. STV Jugendcup stattgfonde. Mit 3 Autos send d'Mitglieder vo de Gymnastikgruppe plus Fans plus Oldies (Nadia und Alex) in Richtig Süde gfahre! Chum dete acho hets denne scho gheisse: "Schminke und frisiere, demet mer en rächti Gattig mache!"
S'Finde vomene Iiturnplatz esch denne no schwerig worde! Das vom Veranstallter vorgsehni Rümli esch öppe 5 uf 5 Meter gross gsi und dete händ secher 5 Gruppe glichzitig welle turne! Mer händ denne im Chäller vom Nationale Sportzentrum es Plätzli för euis gfonde! Esch zwar mega chalt gsi, aber d'Turnerinne händ sech nüt lo amerke, mer chönne euis jo aapasse! (Was mer am spötere Nomitag no es paar mol händ müesse bewiese!!)
Euise Wettkampf het denne met es betzeli Verspötig ca. am 14.45 chönne aafo! Alli send voller Elan und metemene riese Strahle uf em Gsicht in Wettkampf gstartet! Doch nach öppe 30 Sekunde esch Wettkampfleiterin ufs Feld gsprunge! "Halt, halt!" Einigi vo euisne Turnerinne send eso i de Üebig enne gsi, das sie no zemli lang wiiterturnet händ! D'Kampfrichter send ned parat gsi! Und so hämmer nomol echli Ziit becho zum Usschnufe und send denne zum zwoite Mol gstartet!
Oie, oie! D'Bözer Turnerinne händ es bezli fescht ehri Nervosität lo duresickere! Einigi Bäll send devo gfolge und gwössi Turnerinne händ ame echli Orientierigsschwierigkeite gha, aber im grosse und ganze het d'Üebig guet bis sehr guet usgseh!
Wo sie denne vo de Wettkampfflächi cho send, händs alli echli langi Gsichter zoge! Aber das esch schnell verbii gsi! Bald hämmer denne scho die super Note, 9.44, erfahre! Wie euisi Fans und Oldies euis versicheret händ, wäri das de 2. Platz gsi hender Delemont: 9.54! Mer händ euis gfreut!
Wo denne einigi vo euisne Tunerinne uf de Noteaazeigetafele send goge luege, händ sie ehrne Auge ned trout! Delémont: 8.54! (Nodle und Sybille, wie wärs metere Brille?) Mer händ gunne!
Denne esch es losgange! Party i de Garderobe und bim Rangverläse!
Mer freuie euis scho riesig uf de nächsti STV-Jugendcup 2004!
Alex