Skiweekend Grindelwald 29./30. Januar 2011
Am 6si hemmer eus alli bem Volg troffe ond denn semmer metem Car ab rechtig Grindelwald. En Zwöschehalt
hemmer im Grauholz gmacht. Uf de witere Fahrt hemmer „Kindsköpfe“ gluegt, de esch no recht
amüsant gsi ;)
Wo mer denn en Grindelwald acho send eschs no es Zitli gange bes mer denn metem Zug witer zo eusere
Onterkunft – Restaurant Bahnhof Kleine Scheidegg – gfahre send.
Id Zimmer hemmer nonig chönne, darom hets gheisse dosse omzieh… esch chli chalt gsi, aber au das hemmer
alli öberstande. Nachdem mer eusi Täsche em Skiruum – de Bäsechammere – verstaut händ, eschs denn endlich losgange.
Ab ufd Piste!… oder vellecht au zerscht ad Bar eine go neh ;)
Es esch en super schöne Tag gsi, mer hends wörklech troffe metem Wätter.
Wo s denn scho es paarmol gheisse het „Wenn gömmer endlich weder id Beiz“ hend sech allli em Tipi troffe.
Det inne esch en tolli Stimmig gsi… leider esch de Après-Ski scho am 5i fertig gsi ond mer send zrogg id
Onterkunft.
Am Obig hets em Restaurant Bahnhof z‘Nacht geh…ond nachert esch denn s Problem cho…Wo gömmer in
Usgang?
Wie ehr alli wössed, mer hend niene ahne chönne, so semmer halt em Restaurant blebe.
Während sech die einte öbers Personal gwonderet händ, händ die andere s‘Törmlispel gspelt. Das het sech
denn au no zemlech id Längi zoge. För es paari eschs so en tüüre Obe worde…
Nach es paar nächtliche Unruhe ond „am Morge usem Beet und ab in Leet“, hemmer eus denn am nächste
Tag bem Zmorge weder gseh.
Denn eschs weder ufd Piste gange, aber för die meiste au ned bsonders lang, well de verpassti Usgang vom
Vorobe het natürlech müesse nochegholt werde. Darom het meh sech denn ufem Männliche zom Après-
Ski troffe. Vo det us eschs denn au ufd Talabfahrt gange, die esch ned allne so liechtgfalle uf dere veriiste
Piste…
Wo mer denn alli em Car gsi send…ehmm ah nei mer send jo gar nonig alli gsi…
Met einere Stond verspötig hemmer eus denn, wo die Letschte nach ere längere Abfahrt met Zwöschehalt
acho send, chönne uf de Heimweg mache.
Uf de Fahrt esch Chuck&Larry ufem Fernsehprogramm gstande ond mer send schlossendlich gar nedmol so
spot en Böze acho.
Zom Schloss blibt no es grosses Dankeschön an Thömi ond ich muess natürlech no säge…es esch sooo
schön gsi! :)
Dominique