Vereinscup Auenstein 20. Mai 2011
Am Fritig de 20. Mai hämmer eus weder emol zum alljährleche Vereinscup troffe. Das Johr isches uf Auestei gange. D GG hät scho e chli frühner als d’Dameriege müesse ufbräche. Met vell Freud semmer denne zum erste Wettkampf i dere Saison gfahre. De Sebastian isch natürli au weder debi gsi:-). Nach em Iturne für d’ersti Üebig vode GG isch denne au d’Dameriege itroffe, um eus bim Zauberlehrling met vell Gejubel und Geklatsche z’motiviere.
Nachem Zauberlehrling isches für d’Gymnastikgruppe grad metem Reif witer gange. Mer sent scho e chli nervös gsi. Es isch jo quasi s’Debu für d neui Üebig „Wunderwelt“ gsi. Doch dank de erneute Unterstützig vode Dameriege hämmer alles guet dure bracht und fürs ersti Mol turne chönne mer würkli zfrede met eus sie.
Nachem Zauberlehrling und em Reif isch denne s Kliefäld und de Barre met de Dameriege cho. Bedes send neui Üebige für eus gsi, au wemmer de Barre scho am Turnerchänsli zeiget händ. Alles isch meh oder weniger guet gange und ich glaube mer händ met bedem chönne Punkte, vor allem de Schälleursli hät em Publikum sehr gfalle.
Nach dem lange Tag semmer zwar gschafft, aber au glücklech gsi, do mer (weder emol:-)) gueti Resultat händ chönne erziele. Erschöpft semmer denne i eusi Bette gfalle und vellecht hämmer no e chli s’gejuble vom Publikum ide Ohre gha, als eus d’Auge zugfalle und mer ihgschlofe send.
Felicitas