Sportstafette Arosa 8.+9. August 2009
Met Sack ond Pack hämmer eus vorem Volg versammlet ond send zäme uf Arosa tuckerlet…z’Arosa acho, send denn au scho eusi Zimmer bezoge worde ond händ vorem z’Nachtässe grad no Ziit gha för en Apèro! Guetgluunt eschs im Hotelbeizli wiitergange zom gmeinsame Ässe met em TV. Denn wördi säge hämmer es guets Bödeli gha för das mers im Usgang händ chönne loh krache =) Hm…ächli verwonderlech fendis aso scho, das meh eusi Troppe nie nacheme Uswiis frogt…
Fast usgschlofe hämmer denn gmeinsam z’mörgelet ond eus för d‘Stafette parat gmacht. Am halbi zwölfi esch euse Startschuss gfalle ond d Tanja hett chönne zu de Sugu öbere schömme, sie hett denn alles geh, de Hoger so schnäll wie möglech ue z’cho. Dobe acho, hett d’Sugu de Sarah s’Rueder döffe öbergeh. Fast ächli öbermüetig esch sie is nigelnagelneue Bötli ie ghechtet (tuets no weh?) ond hett denn de diräktisti Wäg zu eusere Velofahreri gwählt. D’Diz hett nämmli scho sehnsöchtig uf d’Sarah gwartet ond esch de met Vollgas om de See ome gradlet! Nach dene zwoi e halb Rondene om de See esch d’Diz heilfroh gsi, dass sie’s öberstande hett ond sech d‘Jessi hett chönne uf de 700 Meter langi, langi Wäg mache. Jetz esch d’Alex a de Reihe…guet gschötzt hett sie einisch om de ganz See müesse Skate, bevor sie de Stab de Corinne, eusere Strasseläuferin, hett chönne öbergeh. Sie hett die 500 Meter in Agriff gnoh ond ufem Wäg vo Zueschauer ufgschnappt, dass sie jo gar nömm müesi pressiere…mer sige doch sowiso die letschte! Pah, vo wäge…schnäll esch d’Corinne bim Joni, eusem Chlätterer acho ond hett ehm de Stab öbergeh. Er esch wie versproche wienes Äffli d Fahnestange duruuf ond öber d’Brätterwand g’chlätteret ond scho semmer nömm die letschte gsi =) De Joni hett de Stab mer (Andrea) öbergeh ond ich ha chönne uf d’Ballön ziele…hm jo, zielt hani, nor ned emmer preicht, jäno, trotzdem beni vor zwoi andere Groppe fertig gsi ond ha de Stab de Nadia chönne öbergeh. Met schöne Spagatspröng esch Sie öber d’Hürde gompet, hett de Chorbball im Chorb versänkt ond esch is Ziel gspronge!
Mer händ eusi Ziit sogar verbesseret zum vordere Johr ond händ de för eus supper 42. Rang erreicht! Wedermol esches es genials Wochenänd z’Arosa gsi!!
Andrea