Skiweekend DR und TV Bözen ide Länk - dänk!
Am 26./ 27. Januar hämmer wedermol d’Länk unsicher gmacht. Besser gseit: D’Länk esch ned direkt betroffe gsi, well mer i de Metsch (ufem Berg) gschlofe ond Party gmacht händ. Aber au das esch ned ganz korrekt. Well damol Teilnehmerzahl so gross gsi esch händ Persone müesse em Kuspo (i de Länk onde) schlofe.
So aber jetz emol ganz vo Afang a:
Am Morge früeh, am 6 Uhr, hämer eus scho troffe. Demet de Car au bes of de letsti Platz voll gsi esch, semer met de Fraueriege is Berneroberland greist. Die händ nämli zor gliche Zit eres Skiweekend ofem Bettelberg verbrocht. D’Hefahrt esch ruhig verlofe, aber sie het sech ed Längi zoge. D’Fahrt hämer eus met de Komiker Divertimento verkörzt. Esch wörkli lostig gsi dene zuzluege ond zuzlose, well die send eso felxibel! Wo mer de ede Länk alli abglade händ, wo sie häre ghört händ ond wo de alli no eri Ski gmietet gha händ. Esch eus nome no d’Gondelbahn en Dorn em Aug gsi. Anschienend send die Wintersportler em Berneroberland ned eso Frühufsteher ond mer händ no es Wili müesse ade Gondle warte. Aber au das hämer gschafft ond ca. om die 11 Uhr semer de au of oisne Ski oder Brätter gstande! Skigebiet esch wörkli prima ond Schnee hets au no knapp gnueg gha ond so hämer en schöne Tag met vell andere Lüt verbrocht.
Gäg de Obe händ sech de alli weder em Glashus zom Après-Ski troffe. D’Akkustik dört inne esch wörkli gaaanz interessant, well das Hus eso en Igluform het düend sech d’Schallwelle ganz lostig verbreite ond me het chöne ghöre was die am andere Endi vom Hüsli verzellt händ. Das Phänomen chönt me jetz no usfüehre.. (Eigentli hani welle Divertimento nochemache, aber ergend wie het’s ned eso klappet. Sorry!)
Am 6 Uhr hets de scho Znacht ge ond mer händ benere wonderschöne Obestemmig chöne zo eusere Onterkonft fahre. S’Ässe hämer der so meh oder weniger chöne gnüsse, well jo esch glaub ned eso met Liebi kochet worde… Danach hämer eusi Zimmer bezoge ond send de mol suber worde. Gwössi Lüt händ de es Problem met em Tüechli gha, die send glaub schochli altersschwach...*g*! Spöter hämer de sozsäge dehei en Usgang chöne, en Stock witer Obe esch de nämli Party gstige. Falls mer aber noni so Lost of Party gha het, het me sech nochli chöne em Jaccuzi erhole. Da esch glaub zemli heiss gsi, well die halb Zit händ sech d’Lüt ofem Bassinrand ufghalte ond da het de weder Gspröchstoff öbers Ussehe vo dene Badende ge.
Wenns e Party get duet me au nachem Thema dekoriere ond oisi Gspänli händ schnell müesse merke, dass me die Dekoration nome aluegt ond ned alängt, well sost esch de d’Securitas schnell zor Stell gsi. De Obe het de no sin Gang gno ond d’Lüt send de nach Lust und Laune go pfüsele. Leider händ ned alli so en ruhigi Nacht gha, well en böse Käfer het eusi Sarah ned welle en ruhig lo ond Katja, d’Nadja ond Sybille send zo Krankeschwöstere ond Betreuer mutiert. Sie händ wörkli sehr guet of oise Patient gluegt. Danke vellmol!
Am Morge send de es paar ganz verrockti scho am halb 9, als ersti, of em Sesselilift ghocket ond händ d’Pitse no ohni Lüt gnosse. Alli händ sech met eme feinie aber erkämpfte Zmorge gstärkt bevors de weder ab of Piste oder ed Beiz esch. Am Sonntig händs de alli chli ruhieger gno met fahre ond gäges Endi het me sech de em Glashus no zomene Abschlossdrink troffe, befors de weder abe rechtig Länk gange esch. Ade Talstation het eus de scho de Car erwartet. Mer händ de eusi Skikarte no entwertet i Form vo Gäld oder Naturalie. Leider hets de met em Abfahre nochli duret, well mer halt emmer of gwössi Lüt mues warte. D’Fraueriege hämmer de aber doch no pönktlich abgholt, ich glaube die send rechtig erstungt gsi, dass mer rächtzitig cho send. De Stau het eus de au ned verschont ond die lang Heifahrt hämer eus de met somene komische, chranke ond eifach abartige Film verkürzt. I wet jetz do kei Titel nenne, well es esch ned för alli so en Augeschmaus gsi. Glöckli, müed ond zfrede hämmer de am 8 Uhr weder Böze errreicht ond eusi Wäge händ sech weder trennt, aber d’Erennerig as Weekend wärde no es wili blibe!
jst