Turnfahrt id Lenk 21.+22. Juli 2007
Samstig:
Eusi Turnfahrt isch das Jahr ned nur zwoitägig doregführt worde, sondern het am Samstig Morge bereits am 6.00Uhr gstartet – zBöze ab Bushaltstell. Ab Brugg simmer denn alli gsi, nämli 11 wackeri Turnerinne, jung, dynamisch und voller Erwartig.
Eusi Reis as Zielort het über Bern gführt, denn mitem Cisalpino nach Spiez (wos no ganz schrägi vögel debie gha het, Grünchen und Rötchen lassen grüssen, merci schöön), denn Zweisimme, Oey und schliesslich Lenk – sozsäge en chatzesprung.
Z’Lenk acho simmer grad vom Oehrli Taxi in Empfang gno worde, wo eus uf direktem Weg id Lenker Höchi gfahre het, richtig Wald. Und da waren wir! De Andreas und de Philipp händ det scho uf eus gwartet, eusi zwoi Bergspezialiste; wie sich spöter zeigt het au Motivatore, Händlihalter, Bänklibauer etc.
Denn ischs ruck zuck gange: Jedi vo eus isch miteme sexy gstältli ums gsäss usgrüstet worde, Sicherheitshakke, Seil und Helm. En Wanderweg nomal chli opsi het eus ide Wald gführt, Richtig Wasserfall, wo scho de erschti Poste vomene Abentüürpark uf eus gwartet het – d’Hängebrugg! Natürli eini wo schön gwagglet und ganz sicher ned beidi Füess näbenand Platz händ. Glaub spötistens denn isch s’erste Mal Stille idi ufgstellte Frauerundi ikehrt. Trotzdem sind alli wacker über die Brugg gloffe, au wenn mr vo wietem no s’einte oder andere schüche „uääää hilfe!“ ghört het (übrigens, au dAlex wo Höheangst het, het Fuess druf gfasst, Respekt!). Tapfer simmer grad zum zwoite Poste: 50m senkrecht abseile lah. De meiste hets Spass gmacht. Okay, eimal isch dBemerkig gfalle: „S’nächst Mal lahni dLinse dihei!“
Poste Nummer 3 und zuedem de letscht isch D’ Personeseilbahn gsi. Natürlich KEI Problem für eus inzwüsche; mer chöme ja fengs drus. Bsundere Specialeffekt isch de Wasserfall grad näbedra gsi.
So, denn isch aber definitiv Ziit gsi für en Stärkig. Diä hämmer binere brötlistell gmeinsam mit eusne zwoi Parcoursguide ignoh. Diä händ sich wörkli super Müeh geh, händ eus no en Festbank organisiert und Lenker Spezialitäte uftischt. Au sDessert händs eus (nacheme Wink mit de Holzhütte, gäll tami J) freiwillig und sehr spontan organisiert – genial!
Me sind denn um di 3 zude KUSPO zLenk gloffe, händ det euses 16er Zimmer bezoge und abwächsligswis pfuused oder dusched. Nachem Znacht het sich dFrag gstellt, wie mr jetzt is Dorf chömed – ja dänk mitem Oehrli Taxi. Obwohl eigentli Jazztäg gsi sind zLenk isch ned vell gloffe, also simmer is Andy’s Pub. Det hämmer zerscht Mal agstosse und händ für di richtig Musig dur dJukebox gsorgt. Mir 11 händs jedefalls lustig gha zäme. Und wie chöme mr denn ächt weder zude KUSPO? Heja, mitem Oehrli!
Sonntag:
Am Sonntig am Morge het s Wätter leider emmer nuni besser usgseh, es het grägnet wases abe het möge. Nachdem mer s`gröbschte im Zemmer ufgrumet und packt händ, semmer go z`Mörgele. Spontan hämmer eus denn, für es Schlächtwätterprogramm entschede, obwohl dases nachane ufghört het z Rägne. Also semmer losmarschiert in rechtig Länkerhof, wo mers eus so rechtig guet händ go lo, im Schwäfelbad het mer sech wonderbar chönne erhole.
Nach es paar Stöndli hämmer eus denn uf de Wäg gmacht, go z`Mettag ässe. Und wel mer scho so früeh fertig gsi send, hämer eus scho weder uf de Heiwäg begeh, met em Zug rechtig Brugg. Wel halt nüm alli z Böze wohnid händ sech eusi Wäg z Brugg au scho weder trännt, de Räscht esch denn met em Bus no bes uf Böze und so esch d Tornfahrt au scho z Endi gange.
A dere Stell möchte mer no ganz härzlech de Nadin für die super Organisation danke!