Eidg. Turnfest in Frauenfeld 21. - 24. Juni 2007
Tag 1 (Donerstag, 21. Juni)
Am Donnstig 21. Juni 2007 het’s för Trjojanerinne gheisse ab as Eidgenössische Turnfest noch Frauenfeld. Scho im Zug esch eus ufgfalle, dass s’Wätter ned so schön werd. De Himmel esch nämli rabeschwarz gsi. Ond womer en Zürich am HB omgstege sind hets doch prompt afo Gwettere ond grägnet het’s grad de querewäg in Bahnhof. Mit ere chlinere Verspötig ond cheibe wenig Platz im Shuttlebus send mir doch uf em Wettkampfplatz acho.
Euses Gepäck hämer uf de halbwegs trochene Tribüne platziert. Imene chline Zelt händ mir den es Plätzli gfonde zom iturne. Nochdem sind mir üs go parat mache för’s Troja. Am 11.55 Uhr hets den uf de Gymnastikbühne gheisse alles gäh! Trotz de pflotschnasse Wettkampfflächi händ mir för eusi Leistig e Note vom 9.65 becho, das heisst Tagessieger.
Am Nomittag send mer d’Männerriege bim Schlüderball ond de Tornverein am Barre chräftig go afüre. Nochem Spaghettiässe sind mir euses Militätzält go sueche. Ufem Campingplatz acho, send mir eus go frösch mache ond händ eusi Schlofplätz igrechtet. Aschlüssend sind mir loszoge rechtig Festgländ. Nochem Crêpesässe ond em Bsüechli im ETF-Tower sind mir den gli i eusi Schlofsäck gschloffe, dass mir für de nächsti Tag fit sind.
Tag 2 (Freitag, 22. Juni)
Am Fritigmorge sind mir den gmüetlich go z’Morgä neh ond aschlüssend es paar Vereine bi ehrne Wettkämpf go afüre. De Morge esch vom Wätter her ned so schön gsi, darum hämer eus ca. 1 ½ Stund i de Panzerhalle vom heftige Räge müesse schütze. Am 14.00 Uhr hette eigentli de Rest vo de Dameriege selle itreffe, aber sie send ned do gsi ond die Verspötig het be einige ehri Nervositiät lo spüre.
Aber wo send sie de jetzt?
Ponkt 12.09 Uhr send die restliche Bözerinne as ETF abgreist. Gar ned pönktlech esch hingäge de Zog Rechtig Zöri gsi. Scho händ die erste Diskussione agfange, die langsam S12 oder of de 15 Minute verspötet Schnellzog warte. Mer händ gwartet... Das het au “euse“ Aschlosszog in Zöri gmacht, nor leider ned of eus. Mer send öber dPerrons gstresst, de Zog esch no det gstande, aber well dAbfahrerlaubnis scho erteilt worde esch, hetis de SBB-Befuegti nömme lo istiege. Adrenalin pur, leider vergäbe. Zom Glöck het eusi kompetenti Reiseleiterin vorgängig abklärt weles de nächst Zog of Frauefeld esch. So semmer denn doch no as Ziel cho, wenn au met ere halb Stond Verspötig. Danke Nina!
Chum acho hämer dAlt-Gymnastikerinne troffe ond alli zäme met eusem spontane Wettkampfitorne agfange. Denn esch scho dGrätkombi ofem Programm gstande. Die esch super gloffe, wohl au wäge de tolle Onterstötzig vo eusne Fans! dNote vo 9.37 het eusi Erwartige öbertroffe, en perfekte Start in 3teilige Vereinswettkampf.
Nachere chorze Pause hämer eus bereits weder för euses Wettkampfitorne ond de Krimi (Gymnastik) gröschtet. Doch bede Bühni acho hets gheisse “Verspötig“, mer händ müesse warte. Wenn au eusi Junior-Bonds ihri Reihe bemänglet händ, cha sech es 9.26 gseh loh.
Regelrächt zor Stafette ränne händ eusi userwählte Sprinterinne müesse. Bis zo dem Ziitponkt het deför sWätter ghebt. Aber denn, en Platzräge. För dCasino-Vorfüehrig (Gymnastikgruppe met Reif) händ dTurnerinnen of de deckte Tribüne müesse iturne. Nichts desto Trotz, dBemühige send metme 9.38 belohnt worde. Da het denn zäme metem 8.06 vode Stafette ei Note geh. Mer gset, mer send eher ken Sprint-Verein...
Endli het denn de gmüetlech Teil – sFescht – chöne afange. Dor die enorm Verspötig bede Gymnastik esch euses Programm chorzerhand omgstellt worde ond mer send zerst go Znacht ässe. Au do het sech die gueti Organisation bestätigt, Pilzrisotto mit Süess-Suur-Fleisch ond Gmües, dezue en Salot.
Gstärkt hämer aschlüssend euses Militärzelt bezoge. Am 10i semmer denn “duscht ond usebötzlet“ is ETF-Dörfli ufbroche, am Fescht esch nüt meh im Wäg gstande. Nachemene gmeinsame Drink het sech eusi Troppe of die verschedne Zelt ond natürli de ETF-Tower verteilt. He ond do hetmer sech weder troffe, z.B. bem gmeinsame Abäte vo eusem „Sex on the beach – Altar“. Wäre do Wertigsrechter ome gsi, hättemer secher es glatts 10i gholt. Ämel sUfsehe hämer so erweckt, dass sogar zwe vom TV Weite händ welle eusem Verein biträtte (da händs sogar am Samstig no gwösst).
Einigi het dMüedigkeit ener igholt, andri händ bis i die früehe Morgestonde doreghalte. Aber fast alli send am nächste Morge im Zelt Nr. 19 aztreffe gsi.
Tag 3 (Samstag, 23. Juni)
Also am Morge het eim scho gad chli de Schock troffe för of s’WC gad emol 15 min. astoh ond zom Bluemepflöcke het mer au ned gad onbedingt Zit gha. Nochhär semer de alli oder emel fast alli (Usnahme gits immer, aber da macht jo nüt!) zäme go zmörgele. De Samstig het jede chöne individuell gstalte, mer send de eifach am 4 zäme de Top Sport Obe go luege. Bes döt ane send die Meiste chli go zueluege oder go chille.
Wow, de Top Sport Obe esch wörkli en super Sach gsi, mer händ also schochli gstunt ond wenn me dene Torner zuegluegt het, chont me gad s’Gfühl öber, dass mer sälber gar nüt chan! Am Schloss hämer de au Standing ovation gmacht, obwohl das ned för alli so guet gändet het. De Dane eres Täschli esch nämli unter Tribüne gheit. Aber das Problem het sech schneller glöst, als mir erwartet händ ond zäme also inklusiv de Dane erem Täschli semer de die andere go sueche, wo ned a dere Show gsi send.
Nachdem mer öppis gässe händ ond de Clean and Cool Tanzgruppe eri Show bewonderet gha händ hets gheisse Melone-Plausch! Ergendwie esch das jetz scho e chlini Tradition worde am Tornfest, aber do het glaub niemer öppis degäge. Tamara hets au sehr guet gmeint met eus met dem starke Gemisch ond die Melone esch wörckli igfahre. Danke vellmol oisne zwoi Spenderinne.
Parat ond voller Tatedrang händ sech de 4 muetigi Bözerinne gwogt am Reckissimo mit zmache. S’ Ziel vo dem Spiel esch: Alli Teilnehmer, wo ofere Reckstange hocke mit Hilf vo Ufgabe ab dere Stange zbringe. Es esch wörkli lsotig gsi zom zueluege ond au zom mitmache. D’Sugu het alli Ufgabe (zum Teil au Dank Hilf vom Publikum) gmeisteret ond esch de Siegerin worde.
Denne esch es ab as Fest ond mer händ oises Biwack em Zelt igrechtet. I glaube da Lied „Einen Stern der deinen Namen trägt“ kenned mitlerwile au alli. Ond wenn me sech e dene vellne Lüt verirrt ond alli Gspänli verlore het het me eifach dem Lied müesse folge ond scho het me weder Bözerinne um sech gha. Praktisch!
Be dene vellne Idröck för oisi Sinnesorgan esch au oisi Nase ned zchorz cho: „Chrücht es Schnöpfli, chrücht es Schnöpli s’Näsli uf, s’Näsli uf….“
Nacheme glungene Fest het me sich de e sin Schlofsack zrog zoge, aber velecht häte mir nochli länger sede feste, well die Nacht esch mega chalt gsi ond dorom esch es au ned es gmüetlich gsi. Brrr…
No es Fazit zom Schloss vo dem Tag: Oisi Fraue händ d’ Manne ned eso welle, well es get gar ke „Gschichte“ me zverzelle.
Tag 4 (Sonntag, 24. Juni)
Wo mer fascht alli am Sonntigmorge i eusem Militärzält verwachet send, hämmer nochli verschlofe usgse. Nachdem mer s Zält grumet händ semer rechtig Gymnastikbühni glofe, wo mer denn euses Biwak ufgschlage händ. Uf de Tribühni i de pralle Sonne hämer den d Schlossfiir und d Siegerehrige no gnosse! Nacheme chline Pfüsi uf de Gymastikbühni hämer eus uf de Heiwäg gmacht. I de „Abfertigungshalle“ esch denn d Stemmig weder super gsi, zwösche TV Böze, Hellike, Wittnau usw. het mer glatt vergässe das mer eigentli chli kappot send! Nachere änge Busfahrt semer den au scho bi eusem Extrazug acho. Uf de Fahrt bimene schlöckli Wii send eus uf einisch zwoi vom TV Lupfig cho störe, d Nodle und Tamara händ eres beschti ge zum si met em Gurt zvertriibe, met Schläg uf de Buuch und uf de Arsch! Acho in Brugg händ eus au scho d Effiger erwartet, met dene semmer met em Bus rechtig hei, wo eus au scho de Apero im Zingge erwartet het! De Marsch dors Dorf het eus in Bäre Gfüert, wo mer meteme Gläsli Wii und eme feine Ässe s Tortfescht händ lo usklenge!
Vele härzlech Dank a dere Stell ide Männerriege Böze und im Restaurant Frohsinn für de spendierte Apéro!