Vereinscup in Mülligen am 2.6.2006
Am Fritig, scho gli nachem Firobe, nämli am 4tel ab 6i, hämmer öis em Volg z Böze besammlet. Well es paar aber sooo lang händ müesse schaffe, send die denn grad direkt of Müllige cho. (Wobi, dänke zwar s esch ehner so gsi, as mer äfach scho sooo früeh händ müesse go J).
Die erste Diskussione hets de vo de Fahrersite her ä scho gäh, wos drom gange esch, wo mer müend dore fahre. Gli esch klar gsi, as da jo det ede nöchi esch, womer äscho am Tornfest gsi send. Vo dem her händ de schnäll alli gwösst, wo das Müllige lit.
Det acho, hämmer denn ä gar ned lang nach de Tornhalle müesse sueche. Well d Musig het mer schliessli scho em ganze Dorf ome ghört.
Nach emne chorze Inspiziere vom Wettkampfgschehe hämmer is de aber ä scho ofd Socke gmacht zom itorne.
D'Gerätekombi esch euse erschte Wettkampfteil gsi vo dem höttige Obig und zuedem de erschti „grossi“ Uftritt met eusne neue Glitter-Dress! Au send 5 neui Turnerinne zom erschte Mol met eus amene Wettkampf gstartet. Natürlich semmer alli (vo gross bes chli!!) echli nervös gsi ond händ es bitzeli Bammel gha, wie eusi Vorführig acho wird. Es esch denn schochli en gwaggeli Aglegeheit gsi ond ned eso harmonisch wie seigentlich istudiert gsi wäri!! Aber wo mer denn alli dSchlusspose igno händ , esch allne en Stei vom Herze gheit ond händ chräftig gsmilet!! dKampfrichter händ bemänglet, dass dSympathie vom Barre ond Bode ned öberiistimmt….dBabsi ond dSybille händ die Kritik agno ond werde das för Lyss ond Brugg no omsetze.
Noch de Grätüebig het Gymnastikgruppe korz de Zyt gha om för ehri Külenüebig „Tanz der Vampire“ izturne. Gli druf abe händ sie den die Übig zeigt. Trotz das es paar Küle abegheit sind ond d’Raffa de Fuess öbertrampet het, het Gymnastikgruppe d’ Note 9.48 erreicht.
Am 5 vor 9 semmer alli parad gsi för de Wilhelm Tell. Es esch recht früsch gsi ond nach dem mer alli de Trainer abzoge händ ond met de blute Füess ofem rote Platz gstande send, hets eus schochli tschudderet. Ein Vorteil händ die chalte Füess aber scho gha…mer het so fascht kei Gfühl meh gah ond so esch de Hartplatz ned eso en Tortour gsi! dGymnastik het gsässe. dReihe send suber gsi, dFüess gstreckt ond au glachet hemmer. A de Gsichter vom Publikam hemer gmerkt, dass mer händ chöne zfriede si met eus. Daniela het sich chorz vorem Schluss de Fuess öbertrampet. Doch sie het bes zom bittere Endi fertig tornet. Leider fallt sie jetzt för die Turnfestsaison us.
Am 22.20 Uhr het den Gymnastikgruppe de letscht Uftritt gha ond zwar mit de neue Gymnastik ohni Handgrät zom Thema „Troja“. Trotz isiger Chälti mit fasch minus Temperature het Gym-Gruppe e herrvoragendi Gymnastik zeigt. Noch dere Üebig sind si sehr froh gsi, dass sie gnueg warmi Chleider debi gha händ. Zor Belohnig händ sie e Supernote vomene 9.89 öbercho.
Es esch wörklich bitter chalt gsi a dem 2. Juni-Obig. Zor Ufwärmig händ die einte es chüehls Getränk tronke J, anderi send ganz Nöch Füdli a Füdli gstande ond ganz anderi händ sich eifach dick igkleidet.
Mer händ gwartet …ond gwartet of das Rangverlese! Öbere Halbstond Verspötig ond das bi dere Chälti. Denn esch es los gange: Note 8.40 Damenriege Bözen Gymnastik…ähhhh…ups...falschi Rangliste!! Puhhh…mer händ grad alli ufgschnufet!! Es esch es 9.43 i de Gymnastik ond somet de 3. Rang. dGymnastik Gruppe het met em Troja de 1. Rang beleit ond met de Keule de 3. Rang. Met em Grät hets es 8.79 ond de 13. Rang gäh.
De Saisonuftakt esch eus absolut glonge!