Seeländisches Turnfest in Lyss 17. + 18. Juni 2006
Scho am früehne Morge hämmer euis am Samstig troffe, demet mer nomol d’Änderige i de Gymnastik und im Grät händ chönne durego. Mer send nome meteme Teil vo de Dameriege as Seeländische Turnfest gange.
Alli händ im Aaschluss ehri Rollkofferli, Täsche und Rucksäck phackt und denne semmer ad Bushaltestell gloffe. Alli händ i de Gnosi nochli Proviant kauft. Eingi send froh gsi, das sie no nätti Gspändli debi gha händ, wo ehne alles hindenotreit händ! Es esch halt no Morge gsi!! Ich säge nome „Gsondheit“, wenn mer halt elei wohnt!
Z’Lyss aacho hämmer denne zersch en mega Fuessmarsch zum Sportzentrum müesse mache. Mer händ denne es super Bivack gfonde. Schatte gäge d’Sunne, wo extrem brönnt het und am spötere Nomittag hets Schärme gäge de Räge geh, wos ab und zue uf euis abebrätschlet esch.
Mer händ denne förs Grät iiturnet und euisi neue, super schöne Dress aagleit. Am „Sandstrand“ hämmer Stufebarre und de Bode ufgstellt. Es het immerhin 3 Lüüt gha, wo för euis klatschet händ. Es esch guet gange. D’Synchronität esch ned eso de Hammer gsi, das het euis s’ 9 ni koschtet. Schlossentlich chönne mer met euisem 8.89 zfriede sii.
Denne esches mit eusere Gymnastik Wilhelm Tell losgange. Chlineri Orientierigsproblem händ euis ned chönne usem Konzept bringe. Alli händ alles ghä und mer send miteme 9.34 belohnt worde.
Bi de Pendelstaffette semmer denne positiv öberrascht worde, Anstatt 2x hin und her het jede nume einisch müesse. Do semmer natürli froh gsi. Mer send gsprunge, wie wenn mer em Tell sind Pfiil im Füdli hätte.
Nachdem das mer abchecket händ, wo mer euisi Nacht wänd verbringe, nämli im Barzält, hämmer welle gmüetlech goge dusche. Nüt esch gsi. Esch esch soooo ……. chalt gsi! Ganz „Fresh“ semmer denne goge ässe. Wo denne e Guggemusig Gas ghä het, send denne euisi müede Bei schnell vergässe gsi. Chum semmer es paar Minute uf de Bänk gstande, esch scho en ganze Tisch Manne vom TV ….. halb nackt uf de Bänk gstande! Do semmer gnau rechtig, händ mer euis dänkt. Au meteme ganz spezielle Drink semmer vom TV Steinach verwöhnt worde. D’Bänd het denne s’Festzält leer gspielt! Mer send ab id Bar. Über siebe Egge händ mer denne erfahre, das sie de Wilhelm Tell im Showturne am Sonntig nomol wänd gseh. Das esch en riese Ehr för euis.
Einigi send denne vo de Müedigkeit iigholt worde und händ de 30 minütigi Fuessmarsch uf sich gno. Zum Glöck hets ganz kooperativi Lüüt uf de Stross gha J, so händs de Wäg sofort gfonde!!!
Die andere send no lang ned „hei“. Es het denne wie emmer amene Turnfest erfreulichi und weniger erfreulichi Bekanntschafte ghä. Wir werden sehen…..! Gschloffe hämmer denne ergendwo im Stadion. Wos halt Platz gha het. Einigi händ au lieber weniger Platz gha!!!!
Am Sonntig hämmer denne bim Showturne nomol alles ghä. De Räst vom Tag hämmer met Show und Staffette luege und umehange verbrocht. För euis het denne de 14. Rang i de 4. Stärkeklass usegluegt. Super Leistig Fraue. Härzlechichi Gratulation.
Seeländisches Turnfest wir kommen wieder……..!
Alex