Kreisturnfest Brugg 30.6. bis 2.7.2006
De Wäg zom Tornfestsieg ond chli me
Wenn me de Wäg nome vom Samstig 1. Juli her betrachtet, die vele Arbeitsstonde vo oisem Leiterteam ond Trainings weg loht, gseht er öppe wie folgt us:
Am Samstig 12.55 Uhr esch es los gange ond s’Posti het ois en Brugger Schache brocht. Nachdem mer oises Biwack gfonde ond gsicheret händ, hets au scho gheisse: „Los mer müend go Grättorne!“ Da esch also en beschwerliche Wäg gsi, well die Tornhalle esch ned grad bem Festgländ gsi ond so händ mer halt no en Spaziergang gmacht. Jetzt weiss d’Raffaela sogar wo eri Kunde wohne!*g*.
Womer itornt gha händ ond gli händ müesse go torne semmer aber noni alli gsi, vo de Sugu ond de Nodle wit ond breit no kei Spur. („Wämer echt schnell alüte?“) Aber denne send si doch no uftaucht und mer händ am 15.00 Uhr oisi Grätkombi chöne zeige. Mer danked do auno de Onterstötzig vo oisne treue Fans. Danke! Nach dere Vorfüehrig hets gmischtig Gfühl ge, aber mer händ gar ned vell Zit gha zom diskutiere, well mer weder händ müesse zrog spaziere ond ois för d’Gymnastik vorbereite. Em Nochhinein hets au gar nüt zdiskutiere ge, well mer send met de Note 8.82 belohnt worde.
16.15 Uhr ond de Wilhelm Tell esch em Zentrum vom Gscheh gstande, denne hämer nämlich sletste mol oisi Gymnastik döfe zeige. Mer händ alles geh ond de Wilhelm Tell gebührend verabschidet. Esch ois wörkli super gloffe, wer wär benere Note vo 9.52 ned zfrede?
Glichzitig het ois aber die Note au echli onter Drock gsetzt, well am 17.15 Uhr esch de letschti Wettkamptteil ofem Programm gstande: Schluchbootrace ond Inline Skating. Mer händ gwösst jetzt müemer alles ge ond no vell me!
D’Skater send super Zite gfahre met em Motto: „Schneller als de Wind!“ ond d’Schluchbötler send souveränd d’Aare drab padlet ond send sogar best Zite gfahre. Ned vergässe: „Ond zieh…zieh…zieh…!“ Nachem letschte Wettkampteil send sech die einte schnell go abchüehle ede Aare ond die andere händ sech schnell weder müese go parat mache, well sie händ nomol müesse go torne. Gymnastikgroppe esch ebe met erere Gymnastik met em Thema Troja för oise Tornverein gstartet. Sie händ die super Note vo 9.80 erreicht.
Nach dem Wettkampf hämer ois also en Stärkig verdient ond mer send go Znacht ässe. S’Festzelt esch ned eso brucht worde, well s’Wätter so schön gsi esch , händ sech lieber alli dosse ufghalte.
Nacheme zitli het sech nome no alles om oisi Wassermelone treit. Ui, esch da fein gsi ond mer händ au es paar ifersöchtigi Blick gerntet, womer oisi Wassermelone met Passoa gföllt händ. Zue ge, die Idee esch urspröglich au ned vo ois gsi! I wet mi do no be de Babse entscholdige: „I hoffe Passoa goht guet weder us bem wäsche!“
Nach eim Höheponkt chont de ander, plötzli hets gheisse: “MER HÄND GONNE!”…“Was TORNFESTSIEGER?“…„Ypeee!“ Onglauchlich so öppis, mer händ ois gad nöme chöne beruhige ond ois au ade Resultatewand müesse go vergwössere. Aber es stimmt tatsächli, mer send Tornfestsieger worde met sagehafte 28.20 Pönkt. De hämer ois gad nomol chöne freue well oise Tornverein het auno grad gonne ede 2. Stärkeklass. Mer gratuliere herzlich.
Es het Bolognese ge ond Lüt send ed Loft ghobe worde, esch eifach schön gsi de Erfolg!
Aber nei esch nonig fertig met Höhepönkt, well dene send d’Flying Gym Boys cho ond händ eres Könne zeigt. Wow, händ die öppis droffe ond erst die Körper…Esch also wörkli prima gsi zom zueluege.
So jetzt esch aber mol fertig met Höhepönkt ond mer händs Fest au no chöne go sueche ond tatsächli e oiserer Rondi gfonde. *g*! Die einte send de scho gli verwschonde ond die andere händ bes früeh ed Morgestonde alles ge. S’Barpersonal esch ned emer so zfrede gsi met ois, well sie händ Coyote-Ugly-Style (Tanzen auf der Theke) ned eso cool gfonde.
Schiesslich send de alli mol chli e erne Schlofsäck gsi, aber vo schlofe chamer ned onbedingt rede, well gwössi Lüt send intensifscht gsuecht worde: „Tamara, TAMARAAA, Taaamara, Tami….“ Oder „Sybille wo besch, wo besch Sybille?“
Einigi send de sehr froh gsi, wo si am morge früeh händ chöne go dusche ond anderi händ ond händ eifach ned chöne chötzle! Bem zmorge händ sech de alli weder meh oder weniger frösch troffe.
Am Sonntig händ die einte müesse go Wertigsrichtere, Kampfrichtere, Meitliriege betreue oder sogar ad Swiss Gym Show müesse. Ah ned zvergässe, es paar händ auno müesse sönnele ond chli pfüse!
Ade Dorfstafette händ sech de alli weder troffe. Jo, jo die cheibe Staböbergabe, wenns die ned wörd ge, wäre mer also allne defo gspronge, mues aber säge mini Dame er send super schnell gspronge ond das es halt nome för de 3. Platz glängt het esch au ned schlim, i wörd do nome säge: „S’nöchscht Mol de!“
So esch de Sonntig auverbi gange ond mer wäred scho be de Schlossfir aglangt. Bem Rangverläse hets nomol en freudigi Öberraschig ge, well oisi Meitli send no 2. worde. „Super gmacht!“ Mer händ de de Rase ned grad verloh, well mer en jo heibrocht händ!
Met em Posti semer de gmeinsam met em TV zrog nach Böze gfahre. Em Bäre hämer de zerst emol en Apero spendiert öbercho. Danke vellmol! Ond vorem Marsch dors Dorf hämer müesse Taufene vorneh, wells em Zingge kei Bronne het!
Em Zingge hämer de de Apero vo de Männerrieg no gnosse, au euch Danke vellmol. A dere Stell mues auno erwähnt wärde, dass mer zwoi spitze Einzeltornerinne händ, wo am Fritig eres Könne zeigt händ. D’Sugu esch nämli zwoite worde ond oisi Babse het de stolzi dritti Platz beleit! Herzlichi Gratulation. Au no en Dank an „KTG“ du hesch da wörkli super gmacht, witer so!
Em Zingge hämer de da super Weekend met eme Spaghettiplausch lo usklinge lo. Die einte händs ehner no ruhig gno ond die andere händs Gfühl gha si müesse sech jetz no zom Trinkertisch erküre, obwohl sis de au nöme so lang usghalte händ. Esch halt es asträngends aber onvergässlisch schöns Weekend gsi!
Er händ da eifach super gmacht Fraue! Witer so!
Julia