Turnfahrt 19. + 20. August 2006

Samschtig

Pönktlech am Morge am 9i, händ sech doch no 7 vo de Dameriege troffe wo zäme of Tornfahrt send! Nachdem sech d Patrizia ond d Tamara no met Kinder Überraschungs-Eier iideckt händ, eschs au scho los gange met em Bus Rechtig Brugg, ond vo det  met em Zögli wiiter nach Zöri! Eusi Zogfahrt esch wörkli spassig gsi, mer händ öppis zom nasche, zom spele ond natürli au zom trenke gha! J (en herzleche Dank för d Babse ond d Dane för s „Getränk“ ond de Tamara ond de Diz för d „Verpflegig“) Vo Zöri us esches denn is Böndnerland gange, gnauer gseit zerscht mol uf Chur. Langsam hämmer denn gmerkt, dass mer emmer meh in Näbel ine fahre ond ned, we vo de Kage prophezeit, i sommerlechi 27 Grad! Z Chur aacho esches denn uf Flims gange wo mer au grad hend chönne eusi Unterkunft im Sportzentrum „Prau La Selva“ bezieh. Scho glii händ alli eres chliine Rocksäckli met Proviant gföllt ond es esch los gange of eusi „Wanderig“. Mer händ welle an Uussechtsponkt, onterwägs brötle ond denn wiiter an See. Alli händ recht Honger gha ond wells be 7 Fraue fascht onwahrschinlech esch, dä rechtig Wäg zo de Brötlistell z fende semmer au dementsprächend lang onterwägs gsi ond echlii em Chreis gloffe!! J Doch schliesslech hämmer denn euisi Wuest doch no chönne brötle ond de Wii au no gnüsse! Anderi händ au no vo dem riiese Chenderspelplatz gebruch gmacht, wo fasch so gross gsi esch wes Disneyland ;) Nach guet 1½ Stond Mettags Pause esches denn wiiter gange zom Uussechtsponkt! Mer händ denn de au scho glii gfonde ond händ eus denn nach ere „Schnupf-Pause“ wiiter uf de Wäg gmacht zom See! Leider esch de See iighaget gsi ond mer hetti no müesse Iitrett zahle, drom esch denn nüt worde us eusem Badeplausch ond mer händ eifacht d Umgäbig met em wonderschön blaue Bergsee gnosse! Mer händ denn nöm so möge zrogglaufe ond drom hämmer  es Lift-Bähnli gno wo eus schochli nöcher zom Sportzentrum zrogg gfüehrt het!

Ändlich aacho het eus au scho d Kage empfange. Sie esch ebe erscht of de Obe cho, well sie no Schuel gha het! Mer send ere no go eusi Schlofgemächter zeige ond denn semmer ab go zNacht ässe!

Bevor mer denn in „Uusgang“ send hämmer no en Rondi „Hose-Abe“ gspelt!! Natürli rechtig, so met ächtem Gäld! Jedi het 3 1-Fränkler gha ond am Schloss het d Kage alles gonne!! Denn esches ab is Dorf gange, wo mer au grad i di erscht Bar „Iglu“ gange send. Mer händ bstellt ond denn het doch tatsächlech das Fräulein gfrogt, eb mer denn scho 18ni sige! (sie sälber esch aber chum vell älter gsi) J

Nacheme chorze Drenk semmer denn au scho glii hei, well doch alli chlii mued gsi send. Mer händ sehr loschtigi, medizinischi Gspröch gha. D Gonade hämmer natürli au ned vergässe! Drüü vo eus händ vor luuter Fantasie gar nöm welle iischlofe….s get so vell verschedeni Arte vo Gonade: 3 min. Gonade, Bündner Gonade-Torte.. ond so wiiter.

Schliesslech send denn au alli iigschlofe…

Sonntig

….au wenns nor för es paar Stond gsi esch, denn mer händ am Morge am 4:40 en unfreiwelligi Pipi-Pause gmacht, wells de Kage nöm so wohl gsi esch im Buuch semmer alli verwachet! Zom z Morge hets denn es riese Buffet geh.(För 8 Fraue esches ämel riiesig gsi J )

Nochher hämmer alles packt ond die 4 wo es GA gha hend send met em Bus und Zug nach Versam gfahre, die andere send met de Kage im Auto metgreist! Schliesslech hämmer eus det iigfonde ond au scho euse persönlechi River Rafting „Lehrer“ känne glehrt. Er het eus uusgröschtet met so supersexy Neroprenaazüg, Helm, Rägeschötz, Schwemmweste ond Padel. Nochher hämmer eus s Boot gschnappt, send met em Zögli of Ilanz gfahre ond det grad in Rhii gange! Er het eus no es paar chorzi Infos geh, sini Komandos erklärt ond denn esches los gange. 1 ½  Stond semmer onderwägs gsie, mängisch esches rächt turbolänt zue ond her gange, mängi hets fasch öber s Böötli usegrüehrt, aber mer händ da jo vorhe guebt, we mer sech mue verhalte, wänn mer inegheit!! No blöder esches, wämmer of s WC sett, gäll Tamara ? J

Schliesslech semmer denn gsond weder z Versam onde aacho ond so esch euses Abentüür ofem Rhii au scho verbii gsi. Mer händ denn em Bahnhöfli Beizli  no öpis chliises zor Stärkig gässe ond denn esches au scho weder of d Heireis gange. Die esch relativ ruhig verlofe, well alli meh oder weniger of loschtigi Art ond Stellige gschlofe händ. Z Zöri aacho hämmer no es halbs Stöndli muesse warte ond da hämmer gnötzt zom no eis go näh.

Of de Heifahrt nach Böze hämmer denn no zwoi Bözer troffe, wo das schöne Wocheänd au gnötzt händ zom chlii go wandere.

In Böze semmer denn no lang ned hei, nei, s esch ab in Bäre gange wo mer nomol euses Lieblings-Jass-Spel gspelt händ ond d Kage het no vo ehrem letschte Gwönn euses Getränk zahlt, merci nomol Kage. Langsam send die erschte hei ond die andere händ nochli wiiter gjasst.

So nehmt d Tornfahrt 2006 eres Änd. Mer danke de Brigit förs organisiere ond freue eus scho all ofs nöchscht Johr.

Raffaela