Skiweekend DR/TV am 22./23. Januar ede Länk - dänk!
Am Samschtig am Morge e aller Hergottsfrüeh, hämmer öis em Volg z Böze troffe. Met 20-minütiger Verschpötig hämmer öis denn of de Wäg ed Länk gmacht.
Chorz nach de Akonft händ sech denn einigi wenigi scho of diräktem Wäg en Après Ski begäh, …..was sie denn aber schpöter better bereut händ.
Die wo sech ämol doch no sportlech betätigt händ, send met höfttüfem Neuschnee belohnt worde. Es paar chli ongscheckte Snowboarder esch denn aber au da zom Verhängnis worde. Sie händ eri Sälbschtöberschätzig met ere aschträngende „Skitour“ müesse büesse. Doch au e dere Situation händ si sech guet z hälfe gwösst ond händ no eis uf d Ahsträngig tronke!
Am schbötere Nomitag het mer vor gha sech ede Tipi Bar z träffe, zom no eis go näh. Gwössi händs denn aber dommerwiis nöm gschafft, ohni frömdi Helf vom Bärg abe zcho. Ond so hämmer denn au flochtartig müesse s Tipi verloh.
Nachere feine Schtärkig ond e chli Schtress ede Onderkonft hämmer eus ofe Wäg en Usgang gmacht. Sogar of dere lange Schtrecki bes zode Tipi Bar eschs eus ned langwilig worde. Es paar nöm ganz nüechterni Torner händ nämli ofem Wäg met ossergwöhnleche Ilage för die gwössi Onderhaltig gsorgt. Manch einer het sech bem zueluege scho fascht öpis abgfrohre. Do semmer denne froh gsi, hets ede Tipi Bar es paar Shots geh, zom sech ufwärme.
Nachdem mer denn schlossändlech au em Tipi „händ müesse go“, hets di einte ene gmüetlechi Bar ond di andere ed Disco verschlage. Bes ede früene Morgeschtonde esch det no chräftig gfiret ond abgshaket worde.
Am Sonntig nach es paar wenige ond vor allem onruhige Schtonde Schlof, hämmer eus denn frösch gschtärkt weder of d Pischte gwagt. Wells die ganz Nacht no meh gschneit het, hämmer die neu gwonni Schneepracht nomol e volle Zög chöne gnüsse. Leider het d Sonne au höt ned welle förecho ond so send die einte wedermol diräkt en Après Ski ond desi händs trotz em Näbel nochli usgnötzt.
Eigentli hämmer eus zemli pönktlech of de Heiwäg welle mache, aber ebe esch weder mol nüt drus worde…….
Müed ond zemli greizt semmer schlossändlech met 1.5 Schtonde Verschpötig dehei acho!
Kage ond Dane