Kantonalturnfest Zofingen 25. +26. Juni 2005
Samschtig:
sTornfescht hämmer metme feine Zmorge gstartet, gsponseret vom Bäre. A dere Stell nomol es härzlechs Dankeschön as Bäre-Team. So esches au ned schwer gfalle eus scho am 7ni zträffe. Gstärkt semmer losgfahre Rechtig Zofige. dStärkig het allerdings ned lang aneghebt, wellmer ofem lange Wäg zom Feschtgländ onder dere schwere ond onbequeme Gepäcklascht (Bockleitere) fascht zämebroche send.
Da im Verlauf vo eusre Reis sWätter immer schlächter worde esch, hämmer glöcklicherwis Onterschlupf im Rivella-Zelt gfonde, inmitten einere Schar Mülliger. Scho esch dGym-Gruppe verschwonde ond het sech parat gmacht för ihre 1. Utrett, sEvolution. Nach Uskonft vo dene Tornerinne esch dNote (9.65!?!) so “schlecht“ usgfalle, well de Böhneteppich durchnässt gsi esch. Zielnote wer öbrigens es 9.70 gsi. Aber sPublikum het tobet ond au de Speaker het sech nömme chönne zrogghalte und het met sinre Ussag “ich weiss ned ebis dörf säge dors Mikrofon, aber geili Üebig gsi“ dLüüt zom Schmonzle brocht.
Nachem chorze Mettagslunch esch den scho dGrätkombi ofem Programm gstande. Nach Neuehof z’starte esch wohl kes guets Ohmen gsi. sPublikum esch sehr zrogghaltend gsi, wie leider au dLuutstärki vode Musig. Wellmer die wechtige Tön fast händ müesse sueche, het dSynchronität dementsprechend glette. Das het sech den au die Note vo 8.69 wedergspieglet. Chli demotiviert hämmer den dHalle verloh, ond send grad no ine grausame Platzräge cho. Gflöchtet semmer i alli Rechtige, die Einte sogar zum Bull Riding Zelt, wos fast dezue zwonge worde wäre Rodeo z’riite. Dors schlächte Wätter esch den au sSchlächtwätterprogramm zom Isatz cho ond mer händ die zwe letschte Üebige (Willhelm Tell ond Küüle Vampire) zBrittnau inere Halle müesse vorfüere. Dor de Stress esch be de meischte de Adrenalinspiegel gstege. Trotz oder velecht grad wäge dem, het bem Tell en neui Beschtnote vo 9.57 useglueget, “läck esch das geeeil!“
Während sech die Einte ide Badi abküelet händ, hets för dGym-Groppe met ihrer Vampir-Üebig nomol ernst golte. Au wenn (es paar) Küüle abegheit send, hättemer met de Note 9.31 dörfre zfrede si (was ned alli gsi send...).
Frösch duschet ond usebözlet hämmer euses “Hotel à la Barbara“ bezoge. Zäme semmer ad Fras-Fass-Stross, womer os zwöi feine Menüs händ chönne uswähle. Nachme erste gmeinsame Drink händ sech eusi Wäg scho gli mol trännt. Zwösche umherflügende Bierkartons hämmer eus ide verschedne Zält amüsiert. Leider händ det gli mol es paar nöm ganz so fein doftendi TVler dGränze vom guete Gschmack nömme kännt. Do dezue ke witeri Kommentär!
Deför es paar Highlights os eusem Schlofzält: Pyjamasuche met Taschelampfe, Zähpotze mit Mineralwasser, plötzlech verschwondni Schlofsäck, männlechi Gäscht, blüetendi Nase...
Sonntig:
Chorzfassig: heiss... heisser... am Heisseschte...
Agfange met heisse Rhythme am Morge am 5i, Crazy Frog, Hotel abboue am achti, bis zode seeehr lange Warteschlange am Zmorgebüffet. dGym-Ladies händ nomol ihres Evolution zeigt ade Schloffvorfüerig. Zäme met öppe 100 andere Aktive händ mer die en Grossrumvorfüerig zeiget wo endlich die metgschleickte Bockleitere zom Isatz cho send. Wie scho ade Hauptprob händ au höt dFormatione ned klappet. Es het sogar no en Storz geh (dFrog esch nor, we das öberhaupt chan passiere), ab da wämmer jetzt ned erwähne.
Nachme glongne Schlossbild send es paar onder de Schluuch, andri id Badi ond de Räschte Feschtzält. Wo mer eus alli weder gfonde händ hämmer eus of dHeifahrt gmacht.
Mer döffe of es super Tornfescht zroggblecke ond send met eusem 4. Schlossrang ide 3. Stärkeklass meh also zfrede!!!
(Iris, Nicole, Raffaela, Sonja, Steffi)