Turnfest Naters 5. + 6. Juni 2004
„Grimsel zue!“ eso het euises Abentür Turnfest Naters 2004 aagfange! Dorom hämmer euis halt scho am 5:25 i de Gnossi z’Böze troffe! Alli send püntklich gsi! So hämmer chönne met euisem Spezialbus und em Ueli Brändli nach Naters ufbräche! Nach öppe 2.5 Stond semmer denne iikehrt i de Autobahnraststette Gruyère, wo mer denne no de TV Matzedorf und de TV Buus troffe, wo au uf Naters as Tornfest send! Natürli het Brigitte denne scho öpper vo Buus kennt! Nüt esch gsi met: „Chom mer gönd anes usserkantonals Turnfest, denn kännt euis secher niemert!!!“
Es paar Stonde spöter semmer denne in Naters aacho! Äntli! Mer händ euis es „Bivack“ gsuecht und Babse het sofort eres Zelt agfange ufstelle! Und denne hets au scho gheisse: Iiturne förd Gymnastik vo de Dameriege! Mer send aali meh oder weniger guet dur d’Üebig cho ond es het es 8.85 för euis usegluegt. Nachere chorze Verschnufpause hämmer bereits weder itornet jetzt förd Grätkombination. Mer händ euis klar chönne steigere zum Kreiscup in Brugg und send met de Note 8.67 sehr, sehr zfriede.
Denne hämmer euis müesse tränne. D’Sonja, Babse, Tamara, Steffi, Karin und’ Nicole händ dörfe goge Staffete spenge und d’Gymngruppe het d’Gymnastik met Ball zeiget! D’Staffeteläuferinne händ alles gä! D’Gymgruppe eigentlich au, aber well de Bode fescht vo de Sunne ufgheitzt worde esch, hämmer ned rechtig chönne abstoh und euisi Füess send emmer heisser und heisser worde! Dorom het euisi Konzentration uf euisi Würf, Formatione... echli nohglo! Aber trotzdem het bem 3. Wettkampfteil (Staffete und Gym mit Ball) d’Note 8.8 usegluegt!
2 Stonde spöter esch Gymnastikgruppe nomol im Isatz gsi. Met vell Elan händ sie ehri noi Üebig ohni Handgrät und em Thema Evolution öber d’Bühni brocht, was denne au met emene 9.54 zom Sieg im 1 –teilige Vereinswettkampf Gymnastik Gäste glängt het.
Settigi Leistige müend au gebührend gfiiret wärde. Nachem stärkende Nachtesse, hämmer no „chli“ tanzet, gsonge und gfeschtet bes denne au s’Resultat vom 3-teilige Vereinswettkampf bekannt gsi esch: 7. Platz i de 2. Stärkeklass vo 42 mit de Note 26.32!
Nachere loschtige Nacht hämmer en friedliche Sonntig erläbt. Di einte händ för d’Schuel glehrt, die andere händ gsönnelet und pfüselet ond natürli send mer a de Schlossvorfüerig gsi. Am Viertel ab vieri hett is denne de Ueli wieder i sim Poschti in Empfang gno ond euis secher und gsellig nach Böze zrogggfüert!
(Bericht: Brigitte, Barbara, Katja, Steffi, Alex)
Liebi Turnerinne vo de Dameriege Böze
Ich möchti euich nomol ganz härzlich zu euichne super Leischtige gratuliere! Das händer wörkli super gmacht! Vellecht chönne mer ufs Schenkebergertal no s’einte oder s’andere Zähnteli usehole!
Ganz speziell wetti au im Ueli danke för die super Fahrt und eifach alles dromome!
Alex