Turnfahrt 2004
Samschtig:
Punkt achti esch bi näbligem Wätter d’Besammlig met em Velo bim Volg gsi. Zom Teil guet usgröschtet met Silikonsättel, spezielle Veloonterhose ond super sexy Velodress, händ sech 10 Pelzchöpflis uf t’Fahrt ins Ongewisse gmacht. Drü vo eus, dronter au Patrizia wo alles organisiert hät, händ natürlech gwösst wo ane as es got. Zerscht semmer mal rechtig Freck gfahre ond denn wiiter uf Stei. Dört hämer uf di dütschi Siite gwächslet wo mer es chliises Päuseli met integriertem Apèröli gmacht händ. Scho gli esch’s öber Stock ond Stei am Rhii entlang wiiter gange, jetzt häts nämlech scho gheisse mer müesse rechtig Basel fahre....ond das chann jo no e langi Fahrt wärde! Nacheme Wiili ond vell Gestrampell semmer denn in Rhiifälde acho, wo mer eus imene Iiskafi chorz nedergloh händ. S’Frappè esch zwar guet gsi, deför t’Serviertochter ned die hellscht....mer händ sie glaub eifach ächli usem Konzept brocht, vellecht hät sie jo au öpis vo eusem Picknick metbecho? Scho bald hämer euses Velo weder gsattlet, mer händ jo no vell Wäg vor eus gha. T’Sonne esch denn au emmer meh vörecho ond gäg de mettag hämer wonderschöns Wätter gha. Gäg de mettag semmer aber au bald mal ächli schlapper worde, es esch nämlech Ziit för d’Mettagspause gsi. Es netts Fraueli wo emmer met em Velo got go poschte hät eus denn es Stock wiit gfüehrt ond eus es Plätzli för euses Mahl vorgschlage. Doch denn häts eifach müesse passiere....es hät ächli zescht ond gmacht, do esch a de Brigitte ehrem Velopnöli doch tatsächlech d’Loft usgange. Zöm Glöck hät Diz no sonen super Schuum debii gha wo de Zwöschefall met de Helf vo eusere Babse, de Frau för alles, scho gli behobe hät...hämer dänkt...! Es esch ned lang gange do hät de Brigitte ehre Pneu zo allne Löcher us gsprötzt, was trotzdem no rächt amüsant gsi esch. Dorch de Brigitte ehre Charme hät sie aber schnell en Maa gfonde, wo sie ond ehre Drahtesel met em Auto zomene Velogschäft brocht hät. De Räscht vo eus hät i dere Ziit scho mal agfange ässe ond gwerweisst wo as eusi Reis ächt wert ende. Doch die chliine Föteli wo s’Dizli eus as Hewiis metbrocht hät, händ de meischte au ned chönne wiiterhälfe. Bald esch denn au Brigitte weder ome gsi, meteme nigelnagel neue Pneu ond denn erscht no zomene supber Priis...gäll Brigitte! Spöter hät sie eus denn deför no eis welle zahle drom hämer halt scho weder „müesse“ e Pause mache. Aber mer send au no z’früeh dra gsi drom hät sech das so grad guet ergäh. Ohni wiitere Halt aber mitten dorch de Stadtverchehr semmer bis a s’Ziil gfahre, wo sech denn als Pfadihuus, grad näbem St. Jokob Stadion usegstellt hät. Dört hät eus scho de Patrizia ehr Pfadikolleg namen Andreas meteme wiitere Apèro emfpange. Endlech hämers gschafft....fascht gschafft. De Andreas hät natürlech no öpis för eus vorbereitet. Uf em Programm esch nämlech en Poschtelauf dor die schön Stadt Basel, (met aschlüssendem Beizlibsuech am Rhii) gstande. De Honger ond s’Verlange nachere Duschi händ eus aber scho bald zrog zom hüsli trebe ond denn häts erscht no wie us Chöble agfange rägne. Doch de räge esch ned vo langer Duur gsi ond mer händ euses feine Znacht, vo de Diz als Chochichef, chönne verosse gnüsse. Dodebii hämmer eus grad no Gedanke öbers spötere Programm gmacht ond händ eus zomene Bsuech bim Barfuesswäg geiniget. Weder esch euse treui Frönd namens Velo in Iisatz cho, jedoch meh als mer eus gwönscht händ. Bis mer dä Wäg gfonde händ häts öpe drüü Aläuf brucht, mehreri „Toureschtefüehrer“ ond schlossendlech no en Inlineskater wo sowieso i die Rechtig hät müesse ond eus grad no gfüehrt hät. Aber dä Uufwand hät sech denn wörklech glohnt, eusi Füess händ sech nacher weder wonderbar agfühlt, was einigi vom Födli leider ned händ chönne behaupte!!! Doch wo mer weder zrog gsi send, händ sech denn alli uf t’Schoggibanane vom Füür gfreut ond t’Schmerze send schnell weder vergässe gsi. Bim spötere Beisammensein send trotz sehr wenig Alkoholkonsum no so loschtigi Wörter wie Banüüne ond Magge entstande. S’Ursula esch halt schochli müed gsi, aber do esch sie ned die einzig gsi, es esch glaub för alli en rächt asträngende Tag gsi. Drom send am 12i au scho alli im „Bettli“ gläge ond s’esch ned lang gange, do händ alli pfüselet ond meh hät nor no hi ond da en Schnarcher ghört.
Sarah
Sonntig:
Uf de Bricht vom Sonntig müender leider warte bes d'Babse vo Australie hei chonnt (d.h. in sächs Woche). Sie esch zwar erere Pflicht nocho ond het en gschriebe, aber leider im Gschäft vergässe...