Skiweekend 2004
Samschdig:
Am 6i am morge händ sech langsam alli bem Volg versammlet ond denn esch au scho s Poschti cho. Im Poschti enne het sech denn de Robert, euse Poschtima, vorgschtellt ond mehr händ en härzlech i oisi groppe ufgnoh. Bes uf de Delli René semmer alli vollzählig gsi.
Während de Fahrt send no zemli vell chli müed gsi, aber oisi liebi Babse esch scho chräftig am Wetz verzelle gsi. Onderwägs hämmer de no en chorze Halt bi de Raschtschtätte gmacht ond es feins Znüni konsumiert.
Womer denn aber äntlech i de Länk acho send, semmer schnäll uf oisne Ski ond Boards gschtande. Nome händ nonig all begreffe, dasmer bimene Sässelilift handä aschtoht ond ned eifach ober s'Gländer goht. Dorom händ es paar scho ede erschte viertel schtond en Zämeschess öbercho.
Of de Pischte aber esch es fantastisch gsi. Mehr händ schöns Wätter ond ganz vell Tüfschnee gha.
Nachane semmer denn no schnäll is ,,Grüene Zält'' go en Shot neh. Denn hämmer eus de au scho of de Wäg zo oisem Bus gmacht. Wo denn alli heil onde acho send semmer, wie sech das ghört, no in Après-Ski gange. Tippi-Bar esch ofem Programm gschtande. Deht hämmer de no eis, zwoi gnoh ond händ de eigentlech am 6i weder welle abfahre. Aber s'esch de halt chli schpöter worde. Doch d'Stemmig im Bus esch de scho zemlech guet gsi.
Bi de Onderkonft acho händ sech alli ofs Dusche gfreut aber mehr händ zersch nochli müesse warte. Oisi Zemmer send no schön gsi. Aber mehr händ so oisi Differänze met denne onder ois gha. So Solothurner halt. Frösch duschet semmer de no go z'Nacht ässe, aber ned alli händ schön chönne ässe.
Rechtig gschtärcht semmer nacher weder zo de Tippi-Bar före gloffe. Chum deht gsi händ scho es paar vo ois neui Bekanntschafte gschlosse. Wie meischtens het mer eus au deht scho gli kännt. Die wo halt am lütischte send. Met Bier hets agfange ond be einige esch es de met Schämpiss witer gange. Scho zemlech gli send denn di erschte go schlofe. Nachane hets de gheisse d'Bar macht zue. De semmer halt witer in Grand Bazar ond deht het mehr denn scho bekannti Gsechter vo vorhär gseh. En Fernseh hets au gha. Mer het chönne de gruusige Versüech vo Jackass zueluege.
Denn send denn au scho gli weder es paar hei gange. Einigi vo eus händ sech denn no met em Töggelitesch beschäftigt. Gli esch au scho di nächscht Bar ofem Programm gschtande. Die wo no händ möge send nacher no in Weldstrubel oder Weldstrudel, ich weiss es nöm so genau, go abschtörze. Schliesslech send de au di letschte nach es paar Militär-Üebige, gäll Katja, öppe am 5i go schlofe.
Sonntig:
Am morge hämmer de scho gli weder chönne go ässe ond öppe am viertel vor 10i hämmer us de Onderkonft use müesse. Es händs de zom Glöck alli gschafft.
De Poschtima Robert het ois de au weder zom Sässelileft gfahre. Deht acho händ no zwoi, dank de Brigitte, döffe go es Auto omeschtosse. Aber s'esch de zom glöck au no ufecho.
De semmer au scho weder of d'Pischte go fahre. Aber ned alli händ möge. Die andere send de weder zom ,,Grüene Zält'' go sönnele oder go Schneebängeli in Schnee mache. Schpöter händ sech de alli deht igfonde ond öppis tronke oder en Schnopf gnoh. Di einte send de nomol go fahre ond di andere händ sech denn ad Abfahrt is Tal gmacht.
Wo s'Poschti belade gsi esch hämmer ois denn au scho ofd Heifahrt gmacht.Doch leider esch ned alles guet gange. Trotz Schneechettene esch oise Bus is rotsche cho. De Pfoschte wo im Wäg gsi esch hets ned öberläbt aber oises Poschti het zom Glöck kein Chratzer gha.
Of de Heifahrt het me de nüt meh vo de andere ghört, well dänk alli so müed gsi send ond so esch au oises Skiweekend 04 in Adelbode-Länk dänk z'Änd gange.
Aber mehr händ glaub alli es geils Skiweekend gha.
Zom oise Gruess no z'erwähne: tschööö zäme.
Irene, Katja, Raffaela und Jasmin