Turnfahrt vom 24./25. August 2002 a d'Expo
Am Morge am Sebni hämer ois troffe ond den esch es au scho gli losgange. De Bus het ois of Brogg an Bahnhof brocht ond dört hämmer auscho oise erscht Imbiss gässe. D'Chrege, wo das alles organisiert het, het au no a Zöpfli ond Kafi dänkt. A dere Stell säge mer der au nomol DANKE, das esch wörklich fein gsi. Gstärkt hämmer ois of de Wäg nach Murten gmacht. D'Fahrt esch sehr ruhig verlofe, denn damol hets met de Reservatione emol klappet. En witere Grond es wahrschinlech au no gsi, das alli nochli müed gsi send. Aber nachem erschte Apéro, wos natürlech Römer (Wii) geh het, send all echli wach worde ond wo mer z'Murte acho send, hämmer ois of de Wäg zo de Arteplage gmacht. Nätterwies het ois d'Sonne debi begleitet.
De nöchscht Treffponkt esch erscht weder zum Mettagässe gsi. Bes denn het sech en Teil bem Figuretheater ufghalte, wo d'Sarah prompt för es "Edels Burgfräulein" ghalte worde esch. De Treffponkt förs Mettagässe esch anschienend ned eso klar gsi, es het nämlech jede echli noimed andersch gwartet, aber zom Glöck gets jo Natel. Nach Programm esch es erscht weder am sächsi witer gange, denn semmer nämlech met em Zog nach Neueburg gfahre. Bes denn hämmer ois of de Arteplage, ede Altstadt oder em Coop ufghalte.
Zom Znacht hets nämlech Worscht oder jenachdem för einigi Spiessli vom Grill geh.
En Neueburg acho hämmer zerscht emol oisi Tippizelt müesse sueche, aber zom Glöck gets jo so vell Infoständ ade. Oisi riesig Begeisterig vo dene Zält esch leider fast zerstört worde, well eso en Superma, wo ois för en Meitliriege ghalte het, gmeint het er sigi de Grillmeister. Mer send aber cool blebe ond händ oises Znacht en volle Zög gnosse. Apropo cool, es paar händ sech au no en Neueburgersee gwogt ond händ sech vo dem asträngende Aschtohtag bemene Obebädli erholt. Leider send ned alli glich schnell bem Dusche ond so esch en Teil vo de Groppe scho früehner a d'Arteplage gange. S'Nachtspektal händ aber alli gseh ond am Morge send au alli weder em Zält gsi.
De Räge ede Nacht esch ned för alli eso erfreulich gsi, es paar händ nämlech ehri Tüechli ond Schueh no osse am Zält gha.
De nöchscht Tag het sehr guet agfange. Zom Glöck esch d'Sonne au weder före cho ond am Zähni hämmer es richhaltigs Zmorge döfe gnüsse. D'Organisation vom Zmorgefasse ond d´Hygiene send zwar echli frogwördig gsi, aber mer send jo flexibel!
Am Sonntig hämmer das ewige Astoh vell liechter gnoh, denn d'Barbara het sech zom "Extrem-Baggage-Watching" bereit erklärt. Au der: MERCI Barbara.
Am Eis semmer denn met em Iris Katamaran nach Yverdon gfahre. Z'Yverdon send denn efang alli echli gschafft gsi ond d'Barbara het bem "Extrem-Baggage-Watching" Gsellschaft öbercho. De fitteri Teil esch zom Biespel go Film luege, Spröch go läse oder het eifach dem gepfiffe ond getrommele vo de Basler zueglost. En Yverdon esch ebe am 25. August Baslertag gsi.
Bevor mer ois of de Heiwäg gmacht händ, het aber onbedengt no es Groppeföteli müesse gmacht wärde. Nachem Groppeföteli, wo hoffentlech ned z'schlemm gsi esch, het ois d'Sybille zom Bahnhof gfüehrt. Zogheifahrt esch wie d'Hefahrt gsi, alli send ful gsi ond osser drü Lüt, het niemerd me Römer welle oder möge, wer weiss was i dere vergange Nacht passiert esch! Schlossändlech semmer den en Böze acho ond d'Wäg händ sech trennt. Die wo nonig gnueg gha händ send nämli no en Bäre, so wies sech ghört.