Pizzaessen 2. + 3. Oktober 2004
| --> Flyer |
| --> Fotos |
Am Samstig am Morge am 8 esch es losgange: Tisch ond Stüehl schleicke, ufstelle, Salat rüste, Pizzaböde uswalle, Turnhalle dekoriere.....alli händ flissig zuepackt!!!
Denn no chorz Hei: entweder go pfüserle oder go Chueche bache!!
Am 6 Zobe hemer denn sPizzaesse eröffnet! Schnell send alli Stüehl bsetzt gsi. Ui, jetzt esch es aber ad Säck gange. I de Chuchi händs Pizzas nor no so zom Ofe usgschlüderet ond s‘Servierpersonal het dGäst met zTrinke ond Pizzas versorgt.Am halbi 8 esch denn Zit gsi för de ersti Showuftritt. De Schwingklub het sin Imarsch bsunders gstaltet. Met de Chuehglocke onderem Arm sends dor dTurnhalle zoge. Do esch es eim grad chalt de Rugge abegloffe!! Drufabe händ sie eus zeiget, wie sie ehri Nackemuskle fördere...autsch...het recht brutal gwirkt of „Nicht-Schwingendi“!! Ond natürlich händs no es paar Schwingtechnike zom Beschte gäh. Ach... die flotte Schwinger chamer of www.schwingklub-fricktal.ch bestune.
Of di halbi 9 send die grosse Meitli vo de Meitliriege Böze bstellt gsi. Sie händ ehre Turnfest-Wettkampf nomol zom Beste ghä!! Ond do chan ich nome säge: mega guet gsi!!
Last but not least esch de Turnverein Böze parat gsi för ehre Show-Uftritt. Doch vorem Uftritt het Dameriege no dörfe en Guetschi entgäge näh ond die aller beste Wünsch zom 75jährige Jubiliäum. De TV het en super super Akrobatik-Nummere istudiert ond händ de Showblock met em tosende Applaus abgschlosse.
Doch de Obig esch no lang nonig fertig gsi....vorem Hei go het sich jede natürlich no eis oder zwei Schlummertränkli a de Bar gönnt!!!!
Am Sonntig am Morge hemer denn Turnhalle weder zwäg gmacht. DZit het drängt, denn es het no müesse Salat grüstet, Tisch deckt ond de Turnhallebode gfeget werde!! Jedoch mit vereinten Kräften hemers gschafft ond send parad gsi för eusi Gäst. De Showblock vom Sonntig het traditionell Trachtengruppe Elfige gstartet. Sie händ ehri Tänz underem Motto „75 Jahre Damenriege Bözen“ gstaltet gha. Mer händ no dörfe Gratulatione ond es grosszügigs Zuestüpferli entgägenäh.
A de Miniplayback-Show händ 4 Gruppene teilgno ond eus met ehrne Shows verzauberet. Eusi charmanti Jury het dGruppe ABBA zom Sieger erkore...doch eigentlich send ja alli Music Stars ond sie send meteme super Applaus för de Uftritt belohnt worde. Zom Abschluss vom Showblock händ die chline vo de Meitliriege nomol de Sommer zrogg gholt ond eus es Tänzli zo Latino-Musig zeiget ond sPublikum het sich riesig gfreut ab dem erfrischende Tänzli.
Au am Sonntig esch sChuchiteam ond Servierpersonal im Isatz gsi ond händ eusi Gäst zBöze i de Turnhalle zfriede gstellt.
Am 5 esch es denn scho weder as Abrume gange!!! Im Nu send denn Turnhalle ond Chuchi putzt gsi. Es wunderschöns Wochenendi esch zEnd gange......
A dere Stell möcht ich allne Turnerinne vo de Dameriege Böze ond natürlich au mine Vorstandskolleginne es grosses Danke usspreche. Dank euch esch das Pizzaesse so en riese Erfolg gsi....ond natürlich esch de Spass au das Mol nie zchurz cho.
Ond selbstverständlich dörfe mer eusi Gäst ond eusi „Show-Uftrittler“ ned vergesse....au a euch alli es riese Danke schön......
Ond....ich freu mech jetzt scho weder ofs Pizzaesse 2005!
Tamara El Presidente